Sidan 1998 har vinnaren av Eurovision Song Contest (ESC) blitt kåra av det europeiske folkets telefonstemmer.
Men no blir det slutt på at publikum på eiga hand får avgjere kven som skal sigre i songkonkurransen.
Styret i ESC har frå i år innført ei ordning der poenggjevinga blir delt 50-50 mellom røystene frå folket, og vurderingane frå ein profesjonell jury.
Kritikk mot nabostemming
Innføringa av fagjury kjem etter at mange dei siste åra har kritisert naboland for å røyste på kvarandre, uavhengig av den musikalske kvaliteten.
I tillegg har diaspora-stemming vore eit problem, det vil seie at store minioritetsgrupper stemmer på sitt opprinnelege heimland.
Det har til dømes hagla tyske poeng over tyrkiske bidrag dei siste åra.
Difor har no kvar kringkastar i landa som er med, sett saman ein nasjonal jury av artistar og musikkbransjefolk.
Denne juryen skal gjere ei grundig musikkfagleg vurdering av alle songane, som eit kvalitativt supplement til folkestemmene.
Skeptisk til effekten
VG-journalist Kurt Bakkemoen har følgt songkonkurransen Eurovison Song Contest i 30 år, og er lunken til den nye poengordninga.
- Eg tvilar på at ein slik jury får noko reell innverknad på det endelege resultatet. Eg trur at folket og fagjuryen vil vere ganske samstemde i dei ulike landa.
Særleg landa på Balkan og i Aust-Europa har vorte skulda for å berre røyste politisk, som då Russland vann i fjor, og Serbia i 2007.
Men Bakkemoen meiner Norge gjer akkurat det same som landa på Balkan vert skulda for.
- Det handlar nok mest om at vi synest det er mange Balkan-land med i konkurransen. Vi er sjølve rause overfor Sverige, Danmark og Irland.
- Det kan rett og slett ha noko med vi tenkjer ulikt om kva Melodi Grand Prix-musikk er.
Spent på resultatet
Om tendensen med nabolandsrøysting snur med juryane får vi kanskje svaret på etter finalen i Moskva 16 .mai.
Prosjektleiar for Melodi Grand Prix i NRK, Stian Malme, er avventande.
- Eg har trua på at det er musikken som tel, men det har omtrent blitt ei etablert sanning at naboland stemmer på kvarandre. Vi håper det nye systemet vil roe kritikken - så får vi sjå kva årets resultat blir.
- Trur du ein jury vil gje betre resultat? Sei di meining!