News International kjem denne helga til å setja inn fullsiders annonser i alle nasjonale aviser i Storbritannia.
Der skal selskapet be om orsaking for overvåkingsskandalen som har eskalert dei siste vekene.
Nyheita kjem i ei pressemelding frå James Murdoch, styreformann i News International.
Den kom timar etter at det vart klart at Rebekah Brooks trekk seg som administrerande direktør i selskapet.
News International eigde skandaleavisa News of the World, som vart lagt ned på søndag.
Usikker framtid
James Murdoch har fleire framtredande posisjonar innan News Corporation, morsselskapet til News International.
Han er forventa til å ta over medieimperiet etter faren Rupert Murdoch, som har runda 80 år.
Tidlegare denne veka fortalde Thomas Spence, leiar i Norsk Journalistlag, at framtida til James Murdoch er truga.
– James Murdoch kjem til å bli belasta med News of the World-skandalen. Det er usikkert om James har den tilliten han treng for å kunna ta over etter faren, sa Spence til NRK.no.
Må stå skulerett
Komande tysdag er det venta at Rebekah Brooks, Rupert og James Murdoch må stå skulerett framfor komiteen for kultur, media og sport i det britiske Underhuset.
I pressemeldinga lovar James Murdoch at han og faren skal stilla i komiteen, og at dei vil visa «besluttsomheit i å få retta opp i ting».
Tidlegare i dag sa Labour-leiar Ed Miliband at det ikkje er nok at Rebekah Brooks går av.
– Dette handlar ikkje om eit individ, men om ein organisasjonskultur, sa han ifølgje the Daily Telegraph.
Miliband vil at også Rupert Murdoch skal be om unnskyldning for at uskuldige har fått telefonen sin hacka.
Rupert Murdoch har tidlegare sagt at News Corporation har takla krisa «ekstremt bra».
– Når Rupert Murdoch kjem til underhuset neste veke, forventar folk at han tek ansvar og seier unnskyld for den illegale aktiviteten som har skjedd innanfor organisasjonen hans, sa Miliband.