Jakta suksess - fann det i utlandet

– Eg visste ikkje om eg turte, men eg gjorde det iallfall. Eg berre hoppa i det, seier operasongar Mari Eriksmoen.

Drøymerolla fekk Mari som 26-åring. Ho var akkurat var ferdig med å studere, og heltinna hennar Diana Damrau skulle synge Zerbinetta i operaen Ariadne på Naxos i Wien. Damrau vart gravid, og Mari fekk tilbod om å prøvesynge for rolla som Zerbinetta.

Ho satsa alt, og fekk rolla.

– Eg er utruleg ambisiøs, og har alltid hatt ei veldig drivkraft for det eg driv med. Det må vera noko medfødt, at du har lyst til å opptre, seier Mari.

Kom ikkje inn

Mari har alltid hatt lyst til å opptre, og då ho vaks opp i Ski byrja det med kornett i korps, og deretter blei det fiolin. At ho først ikkje kom inn på musikklinja på vidaregåande skule, stoppa henne ikkje.

– Det kunne gjort eitt eller anna med meg, dytta meg ned, men eg følte at det var feil. Eg skal inn der, tenkte eg, og eg hugsar mamma sat i telefonen omtrent kvar dag. Me fekk folk til å skrive attestar, me gav ikkje opp, seier Mari.

Mari ville inn, og ho kom inn.

Vart oppdaga

Det var då venninna til Mari, Ina Kringlebotn, introduserte Mari for tanta si, den kjende operasongaren Solveig Kringlebotn, at det snudde for Mari.

– Solveig oppdaga at eg hadde talent for det lyse registeret som er i opera, seier Mari.

Saman med Ina valde Mari å studere klassisk song på Norges musikkhøgskole. og for Mari vart det også studiar på musikk-konservatoriet i Paris, og på operaakademiet i København.

– Opera fall naturleg for meg, for eg var litt skodespelar, eg var songar, seier Mari.

Alt som 23-åring debuterte Mari på Den Norske Opera & Ballet, og i dag opptrer Mari på prestisjefulle festivalar som Glyndebourne i England, og for Festival 'Aix en Provence. Ho har gjort det stort, men ho har også måtta tole kritikk.

– Det er ikkje alltid like lett, for du er så sårbar og sjølvkritisk. Det er ein tøff bransje på den måten, at du må tole kritikk, seier Mari og fortel noko som kanskje er noko av årsaka til at ho har lykkast.

– Eg er alltid godt førebudd, seier ho.

• LES OGSÅ: Operasanger Mari (28) vinner omstridt Statoil-million

(Saka held fram under videoen)

SJÅ OGSÅ: ​

Fekk tilbod frå favoritt-koreografen

Guro Nagelhus Schia frå Bærum er ein av svært få som har slått igjennom på den internasjonale ballettscenen, men ho har også dansa heilt frå ho var seks år gamal.

– Eg elskar det eg held på med, og eg trur eigentleg at det er noko ein må gjere, seier Guro.

Ho dansa i kompaniet Carte Blanche i Noreg, men på ein Frankrike-ferie med kjærasten og dansekollegaen Vebjørn Sundby skulle mykje endre seg.

Saman såg dei ei førestilling av favoritt-koreografen Sidi Larbi Chakaoui, og fekk tilbod om å danse for han.

Forlét jobben for draumen

Dei kasta seg rundt og søkte permisjon frå jobben i Noreg.

Eit halvt år permisjon fekk dei, men trengde eit heilt, og begge valde å slutte i jobben i kompaniet.

No reiser dei verda rundt med Sidi Larbi sitt dansekompani Eastman.

Guro definerer suksess som einstydig med å ha det bra.

– Det handlar om å vera lykkeleg med det ein driv med, med korleis ein lever, og med menneska ein har rundt seg. Det handlar ikkje så mykje om draumane, og om å oppnå ting lenger, men om å berre ha det fint, seier Guro.

Dansar, modell, og skodespelar

Guro har også ein duo saman med kjærasten, og tar oppdrag som modell. Då Sidi Larbi hadde koreografien under innspelinga av filmen Anna Karenina var Guro assistenten hans, og fekk også vera skodespelar. Ho spelte kammertenaren til Keira Knightley.

Som artist er det fint å vera mentalt sterk, noko Guro innrømmer at ho er.

– Eg er både sterk og skjør, kanskje. Vebjørn seier sikkert at eg har ein kapasitet til å halde på veldig lenge, at eg er veldig uthaldande, seier Guro.

(Saka held fram under videoen)

SJÅ OGSÅ:

Tora gjer karriere i Berlin

Då bergensjenta Tora Augestad var 17 år gamal oppdaga ho den tyske komponisten Kurt Weill. Ho sa: «viss alt går til helvete, så skal eg flytte til Berlin og bli kabaret-songarinne».

Det gjekk ikkje gale, men det vart Berlin, og det vart kabaret. I dag bur Tora i Berlin og får utfalde seg både som allsidig songar og som skodespelar.

Før Tora flytta til Berlin studerte ho klassisk musikk og jazz, og det gjorde ho både i Oslo, Stockholm, Berlin og i München. Ho har også mastergrad med fordjuping i kabaret-song ved Norges Musikkhøgskole.

– Eg flytta til Tyskland for å lære meg tysk, men også fordi eg ville ha ei europeisk karriere. Det har eg faktisk også klart, seier Tora.

Musikken inn i oppveksten

Det har alltid vore musikk for Tora. Med både foreldre og ste-foreldre som er musikarar, så vart det mykje musikk i oppveksten hennar.

– Hos pappa spelte dei klassisk musikk, og levde eit liv med samtidsmusikken. Hos mamma var det popmusikk og rock, seier ho.

Det kan ha påverka Tora, for som allsidig songar ynskjer ho å spreie seg utover fleire sjangrar.

– Eg er først og fremst opptatt av musikken. Eg har ikkje lyst å velje mellom Schubert eller Berio. Eg har ikkje lyst å velje mellom Kurt Weill, eller å tolke ein song av Jenny Hval, seier Tora.

– Dette passar eg til

Allsidig som Tora er, så har det gjort at ho har jobba som skodespelar for tyske Christoph Marthaler som er ein legende innan musikkteater.

– Heilt sidan eg var liten og opplevde mor mi på teater, så har eg hatt lyst til å jobbe med teater eller musikkteater, og Christoph Marthaler er kjent for å ha lage ein heilt eigen musikkteaterform, seier Tora.

– Det å få lov til å byrje å jobbe med han, var ei stor oppleving for meg fordi eg kjente at «dette her, dette passar eg til», seier ho.

Tora har pågangsmot, og når ho vil noko, så får ho også andre med seg. Då ho starta sitt eige ensemble, Music for a while, så fekk ho med seg musikarane ho sjølv synest er best. Med dei beste, så har Tora også gjort det bra.

– Det har gått ti år, og me held framleis saman, seier Tora.

• LES OGSÅ: Music for a while river ned genregrenser

(Saka held fram under videoen)

SJÅ OGSÅ:

Byrja med piano

KYGO, eller Kyrre Gørvell-Dahll som han eigentleg heiter, vaks opp i Fana i Bergen, i ein heim der faren spelte piano, gitar, og song for ungane.

Piano vart det også for KYGO, som seinare skulle bli verdskjent gjennom SoundCloud og Youtube. Han byrja å spele som seksåring.

– Det var mor mi som «pusha» på, for ho likte veldig godt lyden av piano. Det var veldig greitt for far min lærte meg det, og me spelte saman, seier KYGO.

– Det har absolutt påverka meg.

• LES OGSÅ: Budkrig over norsk 22-åring

Ville bli betre

Då Kyrre byrja i tiandeklasse slutta han på pianotimane, og fotballen tok over. Det gjekk over i at Kyrre spelte piano på eiga hand, utan notar, og han byrja å komponere og mikse songar på datamaskina.

Då han skulle studere vart det ikkje musikk, men økonomistudium i Skotland.

– Eg tenkte det var umogeleg å lykkast med musikk, for det var så mange som heldt på med nøyaktig det same som eg heldt på med. Eg tenkte at eg ikkje hadde noko å stille opp med mot alle dei, seier KYGO.

Han samanlikna seg med andre som hadde laga musikk lenger enn han, og Avicii var førebiletet.

– Eg tenkte at eg ikkje hadde sjanse til å lage det han laga, for det var så bra kvalitet på alt han laga. Men, eg hadde eit håp, og eg hugsar at eg heile tida tenkte at «eg skal bli betre, eg skal bli betre», seier han.

• LES OGSÅ: Avicii til NRK: – Kygo og jeg snakker samme språk

Oppdaga av bloggarar

Sjølv om KYGO var student la han ikkje vekk musikken. Han brukte mange timar i døgnet åleine framføre pianoet og keyboardet, og han vart oppmuntra av vener til å lage meir musikk. Då han la ut musikken på SoundCloud kom også gode tilbakemeldingar i kommentarfeltet og på musikkbloggar.

Då KYGO var med i ein konkurranse om å remikse ein song tok det ein dag før plateselskapet til helten Avicii kontakt. Remiksen blei tatt ut av konkurransen og vart gitt ut.

– Det tok litt av. Etter kvart byrja det å gå fortare og fortare, og eg fekk kontakt med Myles som er manageren min no. Han hjelpte meg med å få songane ut til endå fleire folk, seier KYGO.

Vil halde fram

Fleire bloggarar skreiv om den nye artisten, og låtane fekk fleire avspelingar. Deretter har det berre gått oppover for KYGO som no satsar for fullt på musikken og spelar konsertar over heile verda.

– Det er heile tida noko nytt som skjer, og det er vanskeleg for meg å henge med i svingane innimellom også, seier KYGO.

– Eigentleg drøymer eg berre om å kunne halde på med dette resten av livet, eller så lenge det er mogeleg. Eg synest det er ufatteleg gøy å lage musikk, seier han.

• LES OGSÅ: Kygo selger ut konserter i USA
• LES OGSÅ: Kygo erobrer Europa

SJÅ OGSÅ: