Jakob Oftebro takkar for støtta

Skodespelaren Jakob Oftebro seier han har vore heldig, og takkar for all støtta han har fått etter at han fekk brannskadar i ansiktet under ei filminnspeling.

Skuespiller Jakob Oftebro

Jakob Oftebro fekk alvorlege brannskadar under innspelinga av den svenske TV-serien «Hamilton». Men han har godt håp om å bli bra igjen.

Foto: Mariam Butt / NTB scanpix

Skodespelaren Jakob Oftebro fekk brannskadar i ansiktet under ei filminnspeling i Stockholm. Han var i Sverige for å spele inn TV-serien «Hamilton», som er basert på bøkene til Jan Guillou. Ifølge VG skal Oftebro ha fått innhaldet frå ein molotovcocktail under innspelinga av ei scene med opptøyar mellom politi og demonstrantar.

Skadane han fekk, vil truleg gro. Men i ein post på Instagram, skriv Oftebro at han har vore heldig.

– Eg har trass alt vore heldig, det kunne ha gått mykje verre. Håper bransjen og alle kan lære av dette. vi er sårbare og må ta vare på kvarandre.

Han takkar også for støtta han har fått etter ulukka.

– Tusen, tusen, tusen takk for all støtte og kjærleik eg har fått frå familie, legar, fans, kollegaer og vennar. Det er uvurderleg. Eg lækjast bra og håper eg blir heit god igjen.

Også søstera, Ida Oftebro, stadfestar at broren er på veg til å bli betre etter skadane han fekk:

– Til alle som måtte lure: Jakob er på betringas veg, og kjem til å bli god som ny. han har vore veldig heldig. Vi kjenner oss heldige vi også. God sommar til alle!

Kan få konsekvensar

Det er uvisst kva ringverknader ulukka kan få for prosjekt Oftebro skulle ha vore med i no i sommar. Han skulle blant anna ha spelt saman med faren Nils Ole Oftebro i «Peer Gynt» på Gålå. Far og son spelte den eldre og den unge Peer til gode kritikkar i fjor.

Far og son Oftebro som Peer Gynt på Gålå

Nils Ole Oftebro og Jakob Oftebro spelte «Peer Gynt»​​​​​​​ på Gålå i fjor. Arrangørane håper og trur far og son kan gjenta samspelet i år også, trass i brannskadane.

Foto: Bård Gundersen / gundersenogmeg

Etter planen skal dei ha spelt den tradisjonsrike utandørsframsyninga i år også, men administrerande direktør i Peer Gynt-spelet på Gålå, Marit Lien, seier til NRK det er uvisst om dei kan gjennomføre alt etter planen.

– Vi trur og håper at vi finn ei løysing som gjer at han kan spele som planlagt. Men vi har høyrt at han ikkje kan utsetjast for sollys, så vi må finne ei løysing når det gjeld prøvene på dagtid.

Har sett innspeling på pause

I Sverige er også innspelinga av «Hamilton» utsett på ubestemt tid på grunn av skadane Oftebro har fått. Produsent Patrick Nebout i Dramacorp Pampas Studios seier til NRK at dei arbeider med å legge ein plan for korleis det vidare arbeidet med serien skal skje.

– Vi har sett innspelinga på pause, og arbeider med å finne ein ny plan for korleis vi kan ta opp att innspelinga. Vårt hovudfokus no er at Jakob skal bli frisk att så snart som mogleg.

Svensk politi seier dei vil etterforske ulukka som førte til at Oftebro fekk brannskadane.

Filmatisert fleire gongar

Jakob Oftebro har dei siste åra vore med i fleire skandinaviske film- og tv-produksjonar. Blant anna spelefilmen «Birkebeinerne» og tv-serien «Broen». I februar melde det amerikanske bransjebladet Variety at Oftebro skulle fronte ein ny serie om «Hamilton».

Jakob Oftebro

Jakob Oftebro har spelt i fleire skandinaviske filmar og TV-seriar dei siste åra, som den norske serien «Monster», som blei sendt på NRK i fjor. I februar blei det kjent at han skulle fronte den nye svenske storsatsinga «Hamilton».

Foto: Tom Balgaard / NRK

Bokserien har vore filmatisert fleire gongar tidlegare. I 1998 fekk norske Harald Zwart sitt internasjonale gjennombrot då han laga filmen «Hamilton» med Mikael Persbrandt i hovudrolla. Zwart laga også ein miniserie i 2001 med Peter Stormare som den svenske agenten Carl Hamilton.

Og i 2012 vende Persbrandt tilbake i rolla, då han spelte i filmen «Hamilton: I nasjonens interesse». Den gongen var det Kathrine Windfeld som hadde regien.

Kulturstrøm

  • Festivalstemning i Gamlebyen

    NRKs Festivalsommer ruller videre, og denne helgen har vi vært på Månelanding i Gamlebyen i Fredrikstad. Vi kan by på minigolf med Motorpsycho, intimstemning med Sebastian Zalo og en innføring i festivalens helt egne gartneri.

    Markus Bailey er med på Månelanding 2021 sammen med artister og publikum i Fredrikstad. Gamlebyen byr på intime, stemningsladde konserter i år.
  • Ariana Grande-event i Fortnite

    Frå 6. til 8. august skal artist Ariana Grande vere del av eit musikalsk event i spelet Fortnite. Eventet «Rift Tour» består av fem konsertar. Ifølge Epic Games har dei også designa ein eigen Grande-skin som spelarane kan kjøpe.

    Ariana Grande i 2018.
    Foto: MARIO ANZUONI / Reuters