Ifølgje fleire skular er talet på ungdom med minoritetsbakgrunn som søkjer seg til kunstfag på vidaregåande og høgare utdanning lågt.
Nordic Black Theatre arbeider med multikulturell scenekunst, og dagleg leiar Cliff Moustache trur grunnen til dei låge søkjartala er at ein ikkje kjenner seg velkomne hjå dei ulike kunstinstitusjonane.
– Det handlar om å sende klare signal til ungdommane om at ein vil ha dei der, seier Cliff Moustache.
Vel høgstatus-utdanning
Det er mange ungdommar med minoritetsbakgrunn som tek høgare utdanning, men dei søkjer seg hovudsakleg til studiar med høg status. Særleg lege- og tannlegestudia er populære. Somaye Darvishi går tredje året på medisin, og for henne var det ikkje eit alternativ å studere eit kunstnarisk fag.
– Først hadde eg ikkje opphaldsløyve og eg fekk ikkje lov til å gå på skulen. Så da eg endeleg fekk moglegheit til å studere her i Noreg, tenkte eg at eg måtte nytte høvet til å få meg ei bra utdanning, fortel Darvishi (26) frå Afghanistan.
Darvishi trur at ønsket til foreldra har mykje å seie for kva ein vel, og veit om fleire som kanskje heller hadde vilja studert eit meir kreativt fag.
– Eg ser det blant medstudentane mine på medisin, at dei har valt medisin fordi dei tenkjer at det gjev ei trygg framtid, seier Somaye Darvishi.
– Må informere om jobbmoglegheiter
Nirmala Eidsgård er leiar i Mangfold i Fokus i Akademia (MiFA). Det er ei satsing ved Universitetet i Oslo som jobbar for at ungdom med minoritetsbakgrunn skal ta høgare utdanning. Ho meiner kunstinstitusjonane arbeider for lite for å rekruttere.
– Kulturbransjen har også har vorte betre dei siste åra, men ein treng endå meir satsing, seier Eidsgård.
Ho trur årsaka til dei dårlege søkjartala til kunstfaga skuldast dårleg informasjon om vidare jobbmoglegheiter. Ho har klare råd til korleis kunstinstitusjonane kan nå ut til minoritetsungdom.
– Dei må oppsøkje målgruppa der dei er, og informere om studia og kva ein kan få av jobbar etter at ein er ferdig.
