Gitaristen i The Rolling Stones, Keith Richards, kjem no med bok om det turbulente livet sitt.
– Han er den tøffaste rock’ n roll-gitaristen. Han kan stå framfor 500.00 og banke på, han er så ærleg og ekte det er ikkje noko tull med han, seier Petter Baarli, gitarist i Backstreet Girls.
Natt til i dag vart sjølvbiografien Livet lansert over heile verda. Der avslører Richards det meste om den enorme populariteten, alkohol- og heroinmisbruket, oppturar og nedturar, barna og kvinnene.
Enorm påverknad
The Rolling Stones-gitaristen har inspirert gitaristar over heile verda. Også gitarist i Hellbillies, Lars Håvard Haugen, er stor fan av The Rolling Stones.
– Eg har høyrt på Stones heile livet. Det har påverka meg enormt mykje, og som gitarist då spesielt Keith Richards. Det er så stort hjarte i alt han gjer, han spelar alltid med hjartet utanpå skjorta, seier Haugen.
Men reint teknisk sett er kanskje ikkje Keith Richards blant dei store.
– Har er ikkje virtuos på noko som helst slags måte. Alt han gjer er enkelt, men berre han får det til å høyrest akkurat slik ut, det er det geniale. Han har så mange klassiske riff på samvitet, seier Haugen.
For Petter Baarli er det først og fremst rock'n roll-haldninga som har inspirert han.
– Han har attitude og gje faen-haldning. Det er total rock’n roll, pøbelskap og vill herjing.
Klassiske gitar-riff
– Alle dei fantastiske gitar-riffa, alle flest som speler gitar har på eitt eller anna tidspunkt spelt eitt av riffa hans, seier Haugen.
Riffa i songar som Jumpin' Jack Flash, Start me up, Happy og Brown Sugar har rett og slett vorte klassiske rock' n roll-riff.
– Dei læt like friske kvar gong. Dei er geniale, seier Haugen.
– Dei er tidlause. Miss Amanda Jones frå 1967 – eg vert heilt sett ut, det er så kult, legg Baarli til.
Drøymer om Stones på Torshov
Lars Håvard Haugen fortel at han vanlegvis ikkje er så glad i store stadionkonsertar, men for The Rolling Stones gjer han eit unntak.
– Når Stones kjem på Valle Hovin – då går eg dit.
Begge gitaristane meiner at draumen ville vere å sjå The Rolling Sotnes på ein liten klubb,
– Kansje på Rosen på Torshov, ler Petter Baarli.