- Hesten ser i ein trekant utover til kvar side, men har blindsone rett fram, forklarer Elisabeth Strømmen, dagleg leiar og instruktør i Epona Rideklubb i Bergen. Derfor skal vi alltid gå inn på sida av hesten, slik at han ser oss. Og før vi kjem så langt, skal vi forvisse oss om at hesten veit at vi kjem. Lokk på den og sei namnet. Stå på sida av hovudet når du klappar den i panna og nedover mot mulen.
Lettskremde
Hestar er fluktdyr, som lett kan bli skremde. Derfor er det viktig at dei kjenner seg trygge, at det er ro rundt dei, at dei ikkje blir overraska.
- Springing, roping og skriking er forbode i stallen, seier Elisabeth.
Frå 6 til 70
Epona Rideklubb har 15 hestar og ponniar i stallen, og blir drive på dugnad. Om lag 220 barn, unge og vaksne er medlemmar. Klubben har fleire ridekurs kvar einaste ettermiddag, unntatt søndag. Dei har også eigne ridekurs for vaksne. Klubben eig alle hestane, og medlemmane må ri den hesten dei får tildelt. For å bli ein flink ryttar er det viktig å bli kjent med alle hestane, fordi dei er ulike både av lynne og å ri på.
Treng selskap
- Hestar er sosiale dyr som ikkje trivst med å vere åleine. Dei bør alltid vere minst to i lag, meiner Elisabeth. Ho fortel at hestane kommuniserer med kvarandre, også inne på stallen. Det skjer til dømes aldri at alle hestane legg seg ned på same tid: Det er alltid ein som har jobben med å stå vakt. Rangordninga ordnar hestane opp i sjølve, og det kan av og til gå hardt for seg når ein vil prøve å kome seg høgre opp på rangstigen, eller til og med utfordre sjefen sjølv!
Hest om dagen, folk om kvelden
På Epona Rideklubb er filosofien at hestar skal få lov til å vere hestar utan innblanding frå folk ei stund kvar dag. Då blir dei sleppt ut på bana åleine og får springe og leike i lag som dei vil. Nokre av dei som er bestekompisar held seg saman mest heile tida, og dette er også tida for å kose. Når to hestar står ved sida av kvarandre, hovud mot rumpe, klør dei kvarandre med tennene. Når ein av dei vil bli klødd ein bestemt stad, viser den det ved å klø den andre akkurat der.
Norge Rundt, NRK1, fredag 11. mai kl. 19.30.