Fredag legg kronprinsesse Mette-Marit grunnsteinen for det nye Munchmuseet i Bjørvika. Det blir eit skrin fylt med gjenstandar frå alle dei kommunane der Edvard Munch budde i løpet av livet. Skrinet skal murast inn i foajeen til museet.
Direktør for kultur- og idrettsbygg i Oslo, Eli Grimsby, seier dei ville gjere dette for å vise at det nye museet ikkje berre er eit lokalt museum, men eit nasjonalt signalbygg:
– Vi ønska å involvere alle dei kommunane som Munch har hatt ei tilknytning til. På den måten får vi vist at han betyr noko for heile nasjonen.
Brosje frå fostermor
Ei brosje som tilhøyrde Karen Bjølstad er blant gjenstandane som ligg i grunnsteinsskrinet til Munchmuseet. Bjølstad var tante og fostermora til Edvard Munch.
Foto: Terje Haugnes / NRKBlant tinga som blei lagt i skrinen, var ei brosje etter Karen Bjølstad frå Fredrikstad. Ho var tanta til Edvard Munch, og blei fostermor for kunstnaren då han var fem år gamal. Det var Torill Stokkan, som har forska på Bjølstad i 20 år, som la brosja i grunnsteinsskrinet. Ho fekk smykket i gåve:
– Karen Bjølstad var grunnsteinen i livet til Edvard Munch. Ho var visjonær og hadde den same skapartronga som Munch. Ho såg talentet hans. Ho sa: «like mykje som eg trur på Gud, trur eg på deg som kunstnar».
- Les:
I tillegg til brosja skal desse gjenstandane ligge i skrinet:
- Ei boks med jord frå fødestaden til Munch på Løten.
- Takspon frå gamle Vågå kirke der Munch henta inspirasjonen til Aulamåleria.
- Glattslipt stein frå stranda til Munch i Åsgårdsstrand.
- Glassperler med motiv inspirert av Munch frå Kragerø.
- Krus frå Refsnes Gods på Jeløya.
- Vestbyvotten frå Vestby.
- Ein kopi av testamentet til Edvard Munch og eit eplefrø frå Ekely.
Bygginga i gang
Byrådsleiar Raymond Johansen trur Mucnhmuseet skal halde budsjettet og stå ferdig til opninga i 2020.
Foto: Larsen, Håkon Mosvold / NTB scanpixBak operaen er anleggsmaskinene godt i gang på tomta til det nye Munchmuseet. Når grunnsteinen er lagt ned på fredag, skal byggearbeidet for alvor ta til. Det skjer etter ein lang drakamp om kor museet skulle ligge, og fleire rundar med kostnadsikring av byggeprosjektet.
- Les:
- Les:
Men no er arbeidet i rute, og førebels innanfor budsjett. Byrådsleiar Raymond Johansen har difor eit godt håp om at museet skal stå ferdig slik at dei kan opne som planlagt i 2020:
– Vi skal bygge eit fantastisk bygg for hovudstaden, men også for heile Norge. No gjeld det at bygget blir ferdig på tid, og til rett pris. Og det er eg sikker på at det kjem til å bli.
