I juli saksøkte Gretchen Carlson toppsjefen i Fox News, Roger Ailes, for seksuell trakassering. Ho hevda ho fekk sparken frå kanalen fordi ho ikkje ville innleie eit seksuelt forhold til Ailes.
Seinare i juli gjekk Ailes av umiddelbart, og eigaren Rupert Murdoch tok over sjefsstolen.
No har nyheitskanalen og den tidlegare programleiaren inngått eit forlik, skriv Vanity Fair.
Millionforlik
Dei skal ifølge fleire kjelder ha blitt samde om at Carlson skal få 20 millionar dollar, eller over 165 millionar kroner, i erstatning. Fox News stadfestar overfor nyheitsbyrået Reuters at dei har blitt samde om eit forlik, men vil ikkje seie noko om innhaldet og vilkåra. Men dei har publisert ei offentleg orsaking:
– Vi seier oss svært leie for at Gretchen ikkje blei behandla med den respekten og verdigheiten ho alle våre kollegaer fortener.
Det er uklart om Ailes sjølv må betale noko i forliket. Men han er i utgangspunktet forsikra mot slike avtalar gjennom Fox News, skriv Vanity Fair.
Ifølge magasinet har Gretchen Carlson også gått med på at ho ikkje skal gå til sak mot andre sjefar i Fox News eller mot selskapet.