Om berre nokre få timar får vi eit gjensyn med «Førstegangstjenesten» av og med Herman Flesvig.
I serien følgjer vi fleire unge personar som kjem til ein norsk militærleir for å avtene førstegangstjenesten.
Ein av dei som ventar spent på den komande sesongen er forsvarssjef Eirik Kristoffersen.
– Eg gler meg veldig til sesong to. Sesong éin var veldig morosam, og eg hadde også gleda av å møte Herman Flesvig hos Lindmo i fjor haust, seier han til NRK.
– Lett å kjenne seg igjen
Kristoffersen har lang erfaring frå Forsvarets spesialkommando, og har tenestegjort i Afghanistan i fleire periodar. I mai i fjor vart han utnemnt som forsvarssjef.
– Det er lett å kjenne seg igjen i dei gode vennskapa som oppstår når menneske møtest i militære avdelingar, fortel han om serien.
Frå før er det kjent at Hollywood-stjerner som Aksel Hennie og Kristofer Hivju er med, samt Skam-stjerna Josefine Frida.
Men også kjente fjes som komikar Harald Eia og skodespelar Petronella Barker vil dukke opp i denne sesongen.
Petronella Barker har spelt i ei rekke norske seriar og filmar.
Auka rekruttering
Tidlegare i år kunne NRK melde at rekordmange vil studere i Forsvaret med søkarrekord ved Forsvarets høgskole (FHS).
Generalmajor Henning-A. Frantzen, som var dåverande rektor og sjef for Forsvarets høgskole uttalte at han trur at populære seriar som «Kompani Lauritzen» og «Førstegangstjenesten» kan hjelpe på populariteten.
– Programma om Forsvaret skaper interesse for fleire og det er nok ein faktor som spelar inn, sa han den gongen.
Skråblikk og humor
Forsvarssjefen peiker også på at serien bidrar til interesse for Forsvaret, men han har eit lite atterhald.
– Karakterane er langt unna dei folka eg møter hos oss, understrekar han.
Likevel er Kristoffersen sikker på at mange andre i forsvaret også gler seg til denne sesongen:
– Alle organisasjonar har godt av å bli sett på med skråblikk og humor.
Sjå premieren på «Førstegangstjenesten» i NRK TV kl. 18.00.
- Sjå da Herman Flesvig og Eirik Kristoffersen møttest hos Lindmo i fjor.