I det første klippet møter sjåarane karakterane Eva (som i den franske versjonen har fått namnet Emma Borges) og Jonas, som held på sitt norske namn. Også Vilde, som nå blir til Daphné, eller Daffy, er med i det første klippet.
Det er den franske kanalen France 4, som skal huse serien i Frankrike. Det første klippet blei lagt ut på nettsidene til kanalen fredag 2. februar, men på grunn av rettane til France 4 er denne videoen ikkje tilgjengeleg frå Norge.
Frankrike er det første landet som slepp sin versjon av «Skam».
NRK inngjekk i fjor haust avtaler med sju land om å lage sine eigne versjonar av serien. Nå er Spania, Tyskland, Nederland, Belgia, Italia, Frankrike og USA i gang med å produsere same konsept som det norske.