Forbrukarombodet vil kontrollere nettaviser

I jakta på nye inntektskjelder har stadig fleire mediehus gitt seg i kast med såkalla innhaldsmarknadsføring. Det vil seie at dei lagar reklame som til forveksling kan likne på dei redaksjonelle artiklane.

Slik reklame skal merkast godt slik at lesarane kan klare å skilje mellom reklame og redaksjonelt innhald. Men der har norske mediehus mykje å gå på, meiner forbrukarombod Gry Nergård:

– Det som ser ut til å vere ei utfordring, er at mange ikkje har teke inn over seg at dei no lever i eit regime som gjeld for reklamebransjen. Det vil seie at marknadsføringslova gjeld.

Skjult reklame

Den siste tida har skjult reklame i bloggar fått mykje merksemd. I fjor gjorde forbrukarombodet ein stikkprøvekontroll av 40 av dei mest populære bloggane. Rundt halvparten av dei hadde for dårleg merking av betalt innhald. Men i år er det media som først og fremst skal kontrollerast.

– Vi kan nok seie at det er ein del medium som er dårlegare enn ein del bloggarar på dette. Og vi har sett ein del eksempel vi ville ha tatt opp etter lova. Fleire enn dei som har vore oppe i PFU.

Dei siste åra har klageorganet Pressens faglige utvalg (PFU) behandla fleire klagar på brot på tekstreklamepunkta i Vær varsam-plakaten. I 2015 blei det ti fellingar på dette, mot fire året før. Seinast i førre veke blei VG felt for for dårleg merking av samarbeidet dei har med Rema 1000.

– Har gjort ein god jobb

Generalsekretær i Norsk Presseforbund, Kjersti Løken Stavrum, meiner PFU har gjort ein god jobb i desse sakene.

– Vi har hatt så stor merksemd rundt dette i mediebransjen dei siste åra. Det gjer at det har skjedd ei viktig grensedraging det siste trekvart året.

Men Nergård meiner det framleis er ein veg å gå. Forbrukarombodet vil difor engasjere seg meir i desse sakene i året som kjem.

– Det er bra om enkeltbransjar kan klare å halde orden i eige hus. Men det kan hende vi må hjelpe dei med den siste oppryddinga.