– Dette er overveldande, seier homoforkjempar Kim Friele.
Ho har vore aktivist i 54 år, og på midten av 70-talet gjekk ho i tog med 20 personar. I dag går ho i lag med minst 30.000 andre. Og Friele får massive heiarop frå dei andre i paraden.
– Dette gler eit gamalt hjarte. Det er flott å sjå alle som har funne sin plass. Det begynner verkeleg å bli likeverd.
– Kva trur du er grunnen til at det er så stor interesse for paraden i år?
– Eg trur dei unge greier å fange opp at ein må koma ut av skapet tidleg. Det er ikkje så farleg som ein trur. Og ein må satse noko for å få det livet ein vil.
Håpar på ein homofil Vålerenga-spelar
Den tidlegare fotballspelaren Freddy dos Santos, som nå arbeider i Vålerenga, deltar for fyrste gong i paraden. Han seier at han vil delta fleire gonger.
– Det gjev meirsmak å vera her i dag. Fotballen er tradisjonelt ein bastion der det er vanskeleg å koma ut. Vi står for mangfald, og det ynskjer vi å fortsetja med.
– Har det blitt lettare å vera homofil i fotballmiljøet i dag?
– Tydelegvis ikkje, for det er ingen som har kome ut av skapet enno. Eg håpar vi snart får ein homofil spelar i Vålerenga, det hadde vore bra, seier dos Santos.
– Det har ikkje vore lett
Halvor Moxnes er professor i teologi, og har vore homoaktivist i kyrkja i 45 år. Han er glad for å gå utanfor domkyrkja og veta at dei nå tillèt likekjønna ekteskap.
– Åpen kirkegruppe har vist seg fram og teke mykje av støyten. Det har ikkje vore lett, og det har tatt tid å få kyrkja til å endre haldningane sine. Det er fabelaktig at kyrkja har snudd.
Deltar for fyrste gong
Brann- redningsetaten debuterer i paraden i år, og dei stilte i toget med brannbil og uniformer. Etaten har som kjerneverdi å ikkje gjera forskjell på folk, fortel Lars Håvtun, som er informasjonssjef.
– Alle skal få hjelp frå oss, uansett. Det skal vera greitt å vera annleis både i etaten vår og i samfunnet. Slik skal det vera på gata, og slik skal det vera på stasjonen. Det er kjekt å vera med her i dag.
Gjekk i Noregs fyrste Pride-parade
Thomas Bartholdsen var med da Noregs fyrste Pride vart arrangert i 1982. Han fortel at det har vore ei utruleg forandring som det har vore flott å vera med på.
– Eg var 19 år gamal og hadde akkurat flytta frå Hammerfest. Vi var 300–400 menneske. Alle var konservativt kledde, og vi bar alvorlege plakatar. Vi var ikkje så mange, så vi ropte dette slagordet: «Vi er mange flere, resten er blant dere.»
Bartholdsen fortel at han er takksam for alle som var modige i ei tidleg fase, og som trassa fordømming og fortielse for å arbeide for rettane til dei homofile.
– Eg bur i ein by og eit land som er utruleg inkluderande. Dette er 17. mai for homofile.
– Vi har framleis noko å kjempe for
Helseminister Bent Høie deltar på paraden saman med mannen sin. Han fortel at det er veldig sterkt å høyre historiene frå dei som har sendt inn anonyme historier til Fri sin kampanje #gåformeg.
– Alle historiene frå folk som ikkje tør å delta på Pride beviser at vi framleis har noko å kjempe for.
Høie fortel at det er fantastisk gøy å gå i paraden, og han har ikkje teljing på kor mange gonger han har deltatt tidlegare.
– Eg drit i kva dei andre synest
Sjå video nedanfor av fotballdommaren som går i full dommardrakt, og som ikkje bryr seg om kva dei andre i dommarsektoren synest.
– Det er ei stoltheit for meg å gå her i dommardrakt saman med så mange andre folk, seier han.
Har slått alle rekordar allereie
Ingvild Endestad, leiar i FRI, seier at ho ikkje veit akkurat kor mange som deltar i paraden, men heile festivalen har hatt enormt oppmøte på alle arrangement, og alle tidlegare rekordar er slått. Endestad trur det er eit spesielt år i år, fordi mange har fått augo opp for grunnane til å delta.
– Historiene frå dei som ikkje tør å delta har gjort inntrykk på folk, samtidig som det har skjedd grufulle ting rundt omkring i verda. I dag er det heilt fantastisk å gå her, med alle desse folka i ryggen, seier Endestad.