– Eg blir overraska om eg vinn. Eg låg jo nedst på tippe-sidene idet Stjernekamp starta, seier Bjørn Tomren.
– Når det er sagt skal eg gjere så godt eg kan på laurdag.
Han hadde oddsa mot seg, men har klart å motbevise skeptikarane gong etter gong.
Nå er Tomren i finalen saman med Alexandra Rotan.
– Eg gler meg til å gi folk eit skikkeleg finaleshow. Det er 10-årsjubileum, så dette skal feirast, seier Rotan.
Gjensyn med tidlegare vinnarar
På laurdag er det altså den tiande finalefesten i Stjernekamp, og det blir ikkje spart på krutet.
Det blir fullt hus med gjestedommarane Knut Marius Djupvik og Ingeborg Heldal.
I tillegg blir det framsyning med åtte tidlegare vinnarar og alle årets deltakarar.
Finalistane skal starte showet med eigenkomponert låt, og fyrst ut er Tomren som skal ha med seg Heine Bugge på scena. Saman er dei Polkabjørn og Kleine Heine.
– Det blir stas, seier tomrefjordingen.
– Starta Stjernekamp som sjølvkritisk
Alexandra Rotan skal ha med seg KEiiNO på scena. Saman skal dei framføre ein låt som betyr ekstra mykje for 25-åringen.
– «Venus» er ein låt vi skreiv før Stjernekamp. Den handlar om å sleppe dei sjølvkritiske tankane og tru på at ein er god nok som ein er. Det er nok å berre vere meg, fortel ho.
– Eg starta Stjernekamp som veldig sjølvkritisk, men har blitt sterkare i løpet av konkurransen, og kan framføre låten med den største stoltheit på laurdag!
Tidenes finalefest
Bjørn summerer opp Stjernekamp som ein «overraskande affære», medan Alexandra skildrar det som ei «fantastisk oppleving».
– Eg har fått venar for livet, og eg har også vakse som artist og menneske.
Begge kjem til å sakne dei andre deltakarane og samhaldet dei har hatt. Men fyrst er det show.
– Blir dette tidenes finalefest?
–Ja!, seier Rotan.