Regissøren Amir Chamdim håper filmen Cornelis vil gjere visesongaren Cornelis Vreeswijk tilgjengeleg for ein ny generasjon. Undervegs i prosjektet har han også møtt motstand i det å skulle lage film av eit nasjonalikona i Sverige.
- LES ÒG:
Valet av den norske musikaren Hans-Erik Dyvik Husby i hovudrolla vekte oppsikt. Men regissøren var oppteken av at hovudrolleinnehavarane ikkje skulle herme etter Vreeswijk, eller verte ein parodi.
Sjå kva regissør Amir Chamdim meiner om skodespelar-innsatsen til Hans-Erik Dyvik Husby.
Ikkje rart med nordmann
Men for sonen til Cornelis Vreeswijk var det ikkje så underleg at ein nordmann fekk rolla som faren. Vreeswijk oppheldt seg nemleg i periodar mykje i både Oslo og Tromsø.
– For meg var det ikkje rart, men eg kan tenkje meg at mange andre reagert på det, seier Jack Vreeswijk.
Og når filmen no er ferdig, kan ikkje Jack Vreeswijk kome på nokon annan som heller burde ha spelt rolla.
– I går gjekk eg gjennom alle skodespelarar eg kom på heile verda, kven som skulle kunne gjere det betre, og eg kom ikkje på nokon.
- SJÅ ÒG:
Brukte Jack som målestokk
Hans-Erik Dyvik Husby fortel at han etter beskjed frå regissøren ikkje såg på dokumentarar om visesongaren. I staden brukte han musikken, og Jack Vreeswijk som hjelp til å finne ut av rolla.
– Når Jack sa: det der var likt pappa, fekk eg ei kjensle av at det var eit spøkjelse i rommet, fortel Hans-Erik Dyvik Husby.
Slik forska han seg fram til korleis rollekarakteren skulle vere. Og noko rett må han ha gjort, for det er fleire stader i filmen Jack Vreeswijk verkeleg tenkjer at dette kunne ha vore faren.
– Blikket, spesielt mot slutten av filmen, der du kikar ut, det er uhyggjeleg, seier Jack Vreeswijk.
