Skodespelaren Jussie Smollett hamna på sjukehus etter at to menn skal ha gått til angrep på han på gata i Chicago. Dei skal ha ropt rasistiske og homofobiske kommentarar og slått skodespelaren. Ifølgje TMZ skal dei også ha lagt ei løkke rundt halsen hans og tømt bleikemiddel over han.
Angriparane skal også ha ropt: «Dette er eit MAGA-land!» MAGA er ei forkorting av Trump-slagordet frå presidentvalkampen i 2016, «Make America Great Again».
Smollett var i Chicago for å spele ein konsert og gjere opptak til nye episodar av TV-serien «Empire». I TV-serien spelar han ein homofil artist. Smollett stod sjølv fram som homofil i eit intervju med Ellen DeGeneres i 2015.
Då det påståtte angrepet skjedde, var politiet allereie i gang med å etterforske eit trusselbrev produsenten Fox hadde fått tilsendt. Brevet var skrive i eit trugande språk, og det var strødd eit pulver over brevet som etterforskarane meiner kan vere ein knust paracet.
FBI er kopla inn i saka, som blir etterforska som mogleg hatkriminalitet, melder ABC News.
Innspelinga held fram
Det er uvisst kva følgjer angrepet på Smollett får på innspelinga av den femte sesongen av «Empire». Men ifølgje Variety held dei fram filminga, men produksjonsskjemaet er flytande resten av veka.
På grunn av brevet som blei sendt til produksjonen tidlegare og angrepet mot Smollett denne veka, er det snakk om å skjerpe tryggleiken rundt settet, skriv TMZ.
- Les:
«Empire»-produsent Brian Grazer seier til Deadline at han reagerer med avsky på angrepet mot Smollett.
– Jussie er ein av dei flottaste personane eg har jobba med. Eg håper han kjem seg raskt. Hat og intoleranse har ingen plass i samfunnet vårt.
Massiv støtte
Angrepet mot Smollett har skaka den amerikanske underhaldningsverda. Mange kjendisar har uttrykt støtte til skodespelaren og artisten på sosiale medium, og fordømmer angrepet.
Blant dei er skodespelaren Viola Davis, som skriv at dette er eit rasistisk og homofobt angrep alle bør ta personleg.
Naomi Campbell, som spelte ein motedesignar i dei to første sesongane av «Empire», er også forferda over det som har skjedd. Ho ber både serieskapar Lee Daniels og ordføraren om å gjere noko for at gjerningspersonane ikkje skal kome seg unna.
Også artistane John Legend og Janelle Monáe gir støtte til Smollett og familien hans.
Leiaren i Representantenes hus, demokraten Nancy Pelosi, kallar angrepet ein hån og oppmodar folk til å forplikte seg til å få slutt på hatet.
- Les: