Oslo World Music Festival opnar med seminar måndag 29. oktober, og frå tysdag til søndag denne veka er hovudstaden arena for ei verdsomspennande konsertveke.
Så kva skal du prioritere om du er i Oslo og fritt kan plukke mellom godbitane? Nokre av dei mest multinasjonale lyttarane i NRKs korridorar har valt ut konsertane dei gler seg mest til.
Les også: Verden er et annet sted
– Starta heile oppsvinget til balkanmusikken
Jungeltelegrafens programleiar Arne Berg byrjar på Balkan når han skal oppsummere høgdepunkta:
– Balkanbrasskongen Goran Bregović er eit veldig stort namn som aldri har spelt på festivalen før, seier Arne Berg til NRK.no.
62-åringen Bregović er frå Sarajevo, og spelar på Sentrum Scene torsdag med sitt «Wedding & Funeral Band». Han var rockestjerne i Jugoslavia på 1970-talet, men har seinare først og fremst glimra som filmkomponist:
– Han laga musikken til Emir Kustoricas film «Underground», som starta heile oppsvinget til balkanmusikken dei siste 15–20 åra. Eg har sett han live før, og han er veldig god på konsert.
– Ho har ei fantastisk stemme
Den neste på Arne Bergs «må høyre»-liste er den portugisiske 33-åringen Ana Moura, som syng på Rockefeller søndag 4. november:
– Ana Moura er ei av dei unge, nye stjernene i fadoen, seier Berg.
– Ho er veldig etablert i Portugal, men ganske ukjent i Noreg. Ho har ei fantastisk stemme, og det kan bli ein fabelaktig konsert vel verdt å få med seg.
Berg ser naturleg nok også fram til «Jungelscenen» på Blå onsdag, med tre nye og ganske ukjende representantar for den globale musikkscenen i Noreg. Og han gler seg til konsertane med sine «store heltar frå Mali», Boubacar Traoré og Fatoumata Diawara:
– Dei representerer på ulike måtar det sørlege Mali, den stillferdige, ettertenksame og melankolske musikken. Traoré var stjerne i Mali på 1960- og 1970-talet, og alle dei seinare stjernene frå Mali står i stor gjeld til han. Det er ei enorm glede å skulle sjå han på konsert.
– Her ligg røtene til bluesmusikken
Også Bergs kollega Sigbjørn Nedland i Jungeltelgrafen er full av lovord om Boubacar Traoré, som skal spele på The Crossroad Club torsdag og fredag:
– Han er ein godt voksen musikar og ein fantastisk representant for musikken frå Mali, seier Nedland til NRK.no.
– Dei fleste vil høyre frå første tone han spelar at her ligg vel røtene til bluesmusikken. Det var nok frå desse områda den opphavlege inspirasjonen til bluesmusikken kom. Boubacar Traoré er ein av tradisjonsmusikarane på gitar frå området som vidarefører den gamle tradisjonen best mogleg i ei moderne setting.
Nedland gler seg også til festivalens opningskonsert med det algeriske bandprosjektet El Gusto, som har vore omtala som eit «arabisk Buena Vista Social Club»:
– Desse nordafrikanske musikarane spelte saman for veldig mange år sidan. Dei var muslimar og jødar i same gruppe, men dei vart skilde frå kvarandre og spelte ikkje i lag på lang tid. Eg trur konserten vert ei heilt spesiell oppleving, med typisk nordafrikansk musikk med sterke rytmiske element og arabisk påverknad.
– Strålande melodiar og hektande gitarspel
Marius Asp, musikkmeldar i NRKP3, utropar også ein malisk artist som hovudattraksjon under festivalen:
– Fatoumata Diawaras debutplate Fatou frå 2011 har fått stor merksemd også utanfor den snevre sfæren av entusiastar, seier Asp.
– Det kjem ikkje berre av at gigantar som Tony Allen, Toumani Diabaté og Led Zeppelin-bassist John Paul Jones bidreg. Det er rett og slett eit uvanleg vellukka album i skjeringspunktet mellom pop, sitrande funk og hypnotisk ørkenblues, med strålande melodiar og Diawaras hektande gitarspel i sentrum.
Fatoumata Diawara spelar på Parkteatret onsdag 31. oktober.
– 22 musikarar skal boltre seg i seks timar
Den norske trommeslagaren Paal Nilssen-Love har jobba mykje i Etiopia, og Marius Asp ser fram til maratonkonserten Ethioaction på Blå 2. november, som Nilssen-Love er arkitekten bak:
– Med 22 musikarar som skal boltre seg over seks timar, kan EthioActions konsert på Blå kjapt bli ei eksplosiv affære, seier Marius Asp.
– Bandleiar Paal Nilssen-Love tar med seg ei rekkje etiopiske musikarar, det nederlandske punkbandet The Ex og sin mangeårige samarbeidspartnar Mats Gustafsson frå The Thing. Uttrykket vil strekkje seg frå harpespel til riv ruskande frijazz. Sjå også opp for den Addis-baserte nordmannen Vemund Hareide, DJ Mitmitta, som presenterer etiopiske perler frå kassett og vinyl mellom dei ulike livekonstellasjonane denne kvelden.