Ho har vore ansiktet utad og den styrande handa bak magasinet
i ei årrekkje. No gir Ellen Arnstad seg som sjefredaktør og rykkjer opp i Aller-systemet.– Eg har jobba mykje i mange år og ser at det er viktig å la nye krefter kome til, seier ho.
Sidan 1994 har ho leia bladet, som var eit av dei første norske kvinnemagasina, og i dag kjem ut i eit opplag på over 30 000.
Arnstad vil halde fram som forlagsredaktør i Aller Media.
– Eg skal jobbe med alle blada våre og utvikle nye, så det kan vere at eg skal lage noko nytt. Eg har veldig lyst til å bruke mi redaksjonelle erfaring på heile porteføljen vår, seier ho.
Ny sjefredaktør
Laila Madsø, som i dag er redaksjonssjef i Henne, tek over som sjefredaktør frå månadsskiftet mai/juni.
– Ho har kombinasjonen av både mote, livsstil og reportasje som er sjølve kjernen i Henne, seier Arnstad.
Sjå Ellen Arnstad presentere den nye sjefredaktøren:
Møte med Dronning Sonja
I 1994 kom første utgåve av Henne ut, same dag som Arnstad fødde sin førstefødde son.
– Filosofien då eg starta Henne var at det skulle vere eit mote- og livsstilsmagasin for norske kvinner, eit magasin med veldig høg bilde- og tekstkvalitet, seier ho.
Ho framhever møtet med dronning Sonja i ei av dei første utgåvene av bladet som eit høgdepunkt, saman med opprettinga av designprisen Nåløyet, som denne veka vart delt ut for åttande gong.
- Sjå i nett-TV:
– Ikonet for kvinneblad
–Ellen er gründaren i forhold til norske kvinneblad, meiner kommunikasjonsrådgjevar Lasse Gimnes.
–Først kom familieblada, som til dømes Familien, Allers og Norsk Ukeblad, som først og fremst kvinner kjøpte. Men det var Ellen som lanserte kvinnebladsmarknaden med Henne. Ho blei det store, store ikonet for kvinnesegmentet av magasin, seier Gimnes.
Lasse Gimnes om dameblad-marknaden:
Attraktiv målgruppe
– At Ellen Arnstad lukkast med Henne tydde at det kom mange andre konkurrentar på bana, slik som Hjemmet Mortensen, Bonnier og andre. Det var mange som ønska den attraktive målgruppa, fortel han.
I dag finst det rundt 15 norske kvinnemagasin på marknaden.
– Kvinner, i forhold til annonsemarknaden, er meir attraktive enn menn, meiner Gimnes.
Fare for overetablering
I motsetnad til med dagspressa har det vore ei positiv utvikling i kvinnebladsmarknaden. Men det er fare for ei overetablering, trur Gimnes.
– Det kan bli for mange blad. Vi vil sjå at nokon kjem til å falle frå i tida som kjem. Hjemmet Mortensen har mellom anna meldt at dei vil satse på eit nytt kvinneblad framover, seier han.
14. mars lanserer også Bonnier Media eit nytt kvinnemagasin, Stella.