– Desse finalistane har alle eit veldig personleg uttrykk. Det såg me etter, for me synest det er viktig, seier juryleiar Arild Erikstad.
– Nivået på finalistane er kanskje jamnare og høgare enn me har hatt før, og det seier litt, seier Erikstad.
Annakvart år blir NRK sin solistkonkurranse Virtuos arrangert for unge klassiske instrumentalistar.
Vinnaren får Den Norske Solistpris på kroner 100.000,- og blir Noreg sin kandidat i den internasjonale konkurransen Eurovision Young Musicians i Køln i september.
– Alle fire finalistane vil kunne gjere ein super finale i Køln, seier Erikstad.
– Dei held eit supergodt internasjonalt nivå i den aldersgruppa, legg han til.
Dei fire finalistane er:
- Ludvig Gudim (17) – fiolin
- Trond Sagbakken (17) – trompet
- Michael Andreas Grolid (18) – bratsj
- Inga Våga Gaustad (17) – fiolin
– Var starten på karrieren mi
Programleiar i årets Virtuos er trompetist Tine Thing Helseth som sjølv vann Virtuos i 2006. Då ho fekk reise til den europeiske finalen og representere Noreg, så seier ho det var hennar gjennombrot.
– Eg fekk pris der, og det var starten på karrieren mi. Sidan det har eg reist rundt heile verda for å spele. Vinnaren av Virtuos får den sjansen som eg fekk då, og berre det å komme til finalen er ei bragd i seg sjølv, seier Tine Thing Helseth.
– Alle som har søkt for å vera med er utruleg gode, så alle finalistane er «vinnarar», og det er ekstra stas å vinne når nivået er så høgt som i år, seier ho.
Få med deg Virtuos:
Dei fire finalistane er solistar med Kringkastingsorkesteret i finalen som går av stabelen 19. mars.
Semifinalane og finalen får du med deg på både radio og på TV.
- Semifinalen: På NRK P2 i to delar, sundag 6. mars og 13. mars klokka 10.05, og på NRK2 i Hovedscenen, sundag 13. mars klokka 21.10.
- Finalen går av stabelen laurdag 19. mars, og blir sendt direkte på NRK1 og NRK P2. Programleiarar er Tine Thing Helseth og Hans Olav Brenner.