Eagles of Death Metal tilbake i Paris i kveld

89 menneske mista livet då terroristar storma inn og skaut rundt seg under konserten til Eagles of Death Metal 13. november i fjor. Terroråtaket var eitt av sju åtak i Paris denne kvelden.

Mange band og artistar avlyste turneane sine på grunn av åtaket, men i desember var Eagles of Death Metal tilbake i Paris då dei gjesta U2 på scenen, sjølv om det irske bandet lenge nekta for at det skulle skje.

Søndag spelte dei i Noreg. Og i kveld er Eagles of Death Metal tilbake i Paris igjen. Denne gongen for å fullføre Europa-turneen dei måtte avlyse etter terroråtaka i november. Denne gongen i konsertlokalet Olympia. Staden der dei spelte sist, Bataclan, har vore stengt sidan terroråtaka.

I eit intervju med den franske tv-kanalen iTele snakkar frontfigur Jesse Hughes om den overveldande støtta bandet har fått.

– Vi har fått ein straum av støtte og kjærleik. Det er overveldande. Eg vil ikkje svikte nokon.

Framleis mot våpenkontroll

I intervjuet får Hughes også spørsmål om det han og bandet har vore igjennom har endra synet hans på våpenkontroll. Han har tidlegare støtta retten til å bere våpen i USA, og han seier at det som har skjedd ikkje har rokka ved det synet.

– Eg trur at om eg har endra meining om noko, så er det at inntil ingen har våpen, bør alle kunne ha det. Eg vil ikkje at noko slikt skal kunne skje igjen. Eg vil at alle skal ha den beste sjansen til å overleve. Den kvelden såg eg mange døy som kanskje kunne ha levd.

• Eagles of Death Metal vil gjenåpne Bataclan
• Le Bataclan skal gjenåpnes

No håper Hughes at konserten i kveld kan bli ein vanleg konsert, sjølv om politiet har stengt av store delar av området rundt konserthallen.

– Rock and roll har alltid vore moro, og eg vil ikkje at nokon skal kunne ta det frå meg, eller vennane mine.

Får psykologhjelp

I kveld kjem også Josh Homme frå Queens of the Stone Age til å vere med på scenen. Han var med å grunnlegge Eagles of Death Metal. Han håper konserten kan ha ei terapeutisk verknad.

– Eg håper eg kan gå ut på scenen og vere sterkare enn eg er no. Eg vil ikkje bryte saman framfor alle. Dette er terapi for meg, sa han til nyheitsbyrået AFP.

Under konserten kjem det til å vere 30 frivillige terapeutar og psykologar til stades. Dei skal vere klare dersom nokon i publikum skulle få ein reaksjon på konserten i kveld.