– Overraskinga var stor da mannen min fortalde den store nyheita i fjor. Han ville gje meg dette rommet, som sidan 2. verdskrig har vore lager og garasje, i 80-årsgåve som ein utstillingsarena for kunst og kultur.
Og kongen hadde allereie namnet klart, stallen skulle heite Dronning Sonja KunstStall – med stor «s», fortalde dronninga til latter frå salen.
– Eg vart heilt overvelda, og fullstendig stum.
Men det var mykje å gjera før stallen var klar til å bli ein levande utstillingsarena. Vegen fram til i dag har vore intens, fortalde dronninga, men resultatet har gått over all forventning.
Snøhetta, Statsbygg og Riksantikvaren har vore med i arbeidet med å restaurere og attskapa stallen til det nye formålet.
– Eg vil takke alle for ein imponerande innsats. Eg er både glad, stolt og takknemleg – og ikkje så lite spent og forventningsfull.
Ser attende til Maud
Gåva frå regjeringa er ein fotoinstallasjon basert på Dronning Maud sine fotografi, og vart avduka av statsminister Erna Solberg. Installasjonen er delt i seks ulike tema, der kvart tema blir introdusert med eit antrekk frå dronninga si garderobe i digital utgåve.
Det var dronning Maud som tok med seg den britiske tradisjonen med hestehald til Noreg. Stallen, som nå har blitt kunsthall, var ferdig ombygd i 1911 etter mønster av den kongelege stallen på Buckingham Palace.
– På eitt av fotografia som er utstilt, ser vi dronning Maud på ein av dei mange rideturane på Bygdøy. Medan dronning Maud hadde ein fristad blant hestane, har naturen og kunsten lenge vore fristadane i livet mitt, sa dronninga.
– Eg er stolt over norske kunstnarar og det spennande dei skapar. Gjennom heilt livet har eg vore oppteken av og glad i kunst, og følgt utviklinga på nært hald.
Dronninga avslutta tala med å oppfordre folk til å bruke KunstStallen.
– Eg håpar at vi med Dronning Sonja KunstStall skapar ein stad som vil trekkje til seg besøkjande i alle aldrar frå heile landet – og frå andre land.
- Les også: Kronprins Haakon hedret turdronningen