Dramatisk jamn fektekamp vart avgjerande

– Eg var usikker på kva eg skulle gjere i haust, så eg tenkte – kvifor ikkje? seier Charlotte Fossum (20) om deltakinga i Anno.

Som den yngste deltakaren i 1537 følte Rykkinn-jenta at ho hadde litt å bevise, og etter tre harde veker skulle ho møte Katja Kålheim i sin første duell:

– Eg gleda meg til den fektekampen. Eg følte under kampen at det heile tida kunne gå begge vegar, men det var berre å ta det som det kom!

Den dramatiske fektekampen svinga fram og tilbake mellom ho og Katja, som til slutt gjekk av med sigeren 10-9, og sende Charlotte heim.

• Sjå heile fredagens episode av Anno her

Blei svimmel av mobilskjermen

– Det var veldig deileg med ein gong, berre å kome ut. Endeleg kunne eg ete kva eg ville, og leve eit vanleg liv, seier ho.

Då ho skrudde på mobiltelefonen for første gong vart ho svimmel. Det skarpe lyset hadde alt rukke å bli såpass uvant. Men nokre ting er 2017 betre på:

– Maten, den saknar eg ikkje, seier Charlotte, før ho tenkjer seg litt om.

– Eller, Anne-Berit laga ein god rødbetesalat. Det hadde vore fint å få den servert av «mormor» igjen.

Charlotte beskriv seg sjølv som eit veldig sosialt menneske, og ei lukka verd der ein kun er saman med 13, så 12, så 11 andre folk vart spesielt tøft. Heldigvis var det alltid nokon ho kunne snakke med, og nettopp Katja var ein av dei.

– Ein kan jo bli sliten av maset til Katja, men slikt kan jo skje alle. Der inne kunne vi snakke om alt.

• LES OGSÅ: Slik lager du Anno-maten

– Veldig tøft, lite mat, og lite søvn

Charlotte er aktiv som cheerleader for Charmers All-Stars, og har også vore på landslaget i cheerleading – men den første veka vart ho dels sett ut av ei betennelse i handa som følgjer av steinhugginga til sveinestykket.

Etter å ha røke ut mot Katja etter tre veker i 1537, er det nokre ting heimesjukepleiaren skulle ynskje ho hadde fått vist betre fram:

– Det ser kanskje ut som eg skryt på meg at eg var sterk og hadde gode fysiske eigenskapar. Det kom kanskje ikkje så godt fram, seier ho, som også dreiv med styrkeløft då ho gjekk high school i Texas.

– Eg er glad eg ikkje tok fektekurs på førehand. Då vart det berre å gjere så godt ein kan, å hoppe ut i noko heilt nytt. Slik var eigentleg alt der – masse nytt som ein må kaste seg ut i.

• Sjå alle episodar av Anno her
• Anno sendast kvar måndag og onsdag kl. 19:45, og fredag kl. 19:55 på NRK1.