Domstol gjer om overgrepsdommen mot Bill Cosby

Bill Cosby blei dømd til fengsel mellom tre og ti år for overgrep, etter at han i 2018 blei funnen skuldig i å ha dopa ned og valdteke ei kvinne i 2004.

Juryen fann Cosby skuldig på alle punkt i saka, som blei omtalt som den første rettslege avgjerda i #metoo-kampanjen.

Han anka avgjerda i 2019, men fekk saka avvist. I fjor sommar anka han til høgsterett i Pennsylvania. Dei har no gjort om dommen, og krev at han blir sett fri umiddelbart.

Onsdag kveld er han sett fri, melder AFP.

Cosby møtte pressa ei stund etter at han kom heim. Då sa han gjennom ein av advokatane sine at det var godt å kome heim til kona og barna, og at dei siste tre åra har vore vanskelege.

Stolte på gammal lovnad

Retten seier Cosby hadde stolt på ein lovnad frå ein tidlegare aktor i saka om at han ikkje skulle bli straffa for ting han sa i avhøyr den sivile straffesaka.

Avtalen blei gjort for over 15 år sidan, ifølge Reuters.

Statsadvokat Kevin Steele, som arresterte Cosby, var forplikta til å følge løftet til forgjengaren, slår retten fast.

Høgsterett meinte difor at dei måtte gjere om på dommen, skriv dei i rettsdokumenta.

Mange skuldingar

Rundt 60 kvinner har skulda Bill Cosby for seksuelle overgrep. Dei eldste tilfella er frå midten av 1960-talet, medan dei siste tilfella skjedde på 2000-talet.

Skuldingane hadde mange fellestrekk. Kvinnene seier dei fekk tilbod om hjelp til å få i gang karrierar, og blei invitert på middag. Der blei dei dopa ned med pillar eller drinkar, og deretter utsette for seksuelle overgrep.

Dei fleste sakene er forelda, men ei sak frå 2004 førte til tiltale og dom i 2018.

Les også: Bill Cosby med første opptreden etter overgrepssaken

Les også: Bill Cosby i retten igjen: – Umulig med rettferdig rettssak etter #metoo

Populær familiefar

Den 83 år gamle komikaren og skodespelaren har hatt ei rekke roller i ulike seriar sidan 1960-talet, men er kanskje best kjent for «The Cosby Show» der han i åtte sesongar spelte legen og familiefaren Cliff Huxtable.

Han skreiv også bestseljande bøker om korleis ein burde oppdra barn.

Men etter kvart som det kom fram stadig nye skuldingar mot han, og rettsprosessen mot han starta, mista Cosby både jobbar og titlar.

I 2018 blei han kasta ut av filmakademiet som deler ut Oscar-prisane. Han blei også fråteken ein æresgrad ved Temple-universitetet i Philadelphia.