I dag blei det kjent at Discovery får rettane til å vise OL i Europa frå 2018 til 2024. Det store spørsmålet som mange lurar på er: Kva vil ein kunne sjå gratis?
Discovery eig blant anna TV Norge, MAX og Eurosport. Knut Kristian Hauger er redaktør av medietidsskriftet Kampanje. Han trur ikkje TV Norge torer å ta betalt for å vise dei største arrangementa i Vinter-OL:
– Å legge eksempelvis herrestafetten i langrenn på betal-TV, det er som å kaste sneipen i kruttskuffen. Det veit direktøren i Discovery Networks Norway, Harald Strømme. Han er ein fornuftig direktør og vil ikkje gjere det, seier han.
Trur fleste sendingar blir gratis
Hauger som har følgt det norske og europeiske mediemarknaden i lang tid, har denne gledelege spådomen til dei som likar å sjå sport utan å betale for det:
– Eg trur mesteparten av OL-sendingane vil gå gratis på reklamefinansiert TV, som TV Norge. Discovery vil satse på å sende veldig mykje av OL på ein open kanal der dei kan tene på reklamesal, seier Hauger.
Han seier vidare at han regnar med at dei vil vise absolutt alle sendingane på Eurosport, som er ein standardkanal for dei som har kabel- og parabol TV.
NRK og TV2 sjanselause
Den amerikanske selskapet Discovery Networks vann rettane til å vise både sommar og vinter-OL i heile Europa. Det bladde dei opp rundt 11 milliardar norske kroner for. Sjefredaktør i TV2, Olav T. Sandnes seier at trass i at to store norske mediehus slo seg saman, så hjelpte det lite:
– Discovery har lagt inn eit bod på europeisk nivå, og då hjelp det lite at TV2 og NRK legg inn bod saman, som allmennkringkastarar.
Trur på betalt nettinnhald
Hauger i Kampanje trur Discovery har eit tredelt mål med kjøpet av rettane til å vise OL. Det eine er å tene mest mogleg på reklamesal som følge av OL på ein open gratis TV-kanal:
– Det andre er å styrke Eurosport som merkevare. Målet er å tene meir pengar av leverandørane av kabel- og parabol-pakker, som følge av OL og eit sterkare Eurosport. Dette vil igjen kunne bety dyrare pakker for forbrukarane, seier Hauger og legg til:
– Det tredje målet til Discovery vil vere å bruke OL til å løfte strøymetenesta deira D-Play. No ligg dei eit stykke bak TV2 og NRK på nett og strøyming, seier redaktøren. Han trur altså at det meste av OL frå 2018 framleis vil bli vist gratis.