Dette bygget vil ikkje KrF ha

Tysdag vedtok Oslo byråd at dei vil ha høghuset til den spanske arkitekten Juan Herreros som nytt Munchmuseum ved sidan av Operaen i Bjørvika.

Dermed går dei inn for førstevalet til juryen i arkitektkonkurransen.

Kulturbyråd Torger Ødegård (H) var tysdag særs nøgd med valet til byrådet i hovudstaden.

- Eg er glad for at vi er eit stort skritt nærare å få etablert eit fantastisk nytt Munch-museum.

Men stortingsrepresentant for KrF, Hans Olav Syversen, vil arbeide for at ein av dei to andre vinnarane av konkurransen blir bygd.

- Bør snu i tide

- Eg synest det er eit veldig uheldig val. Bygget framstår som ein byggjekloss i glas med ein liten knekk, som blir ståande som ein stor vegg høgt over Operaen. Dette skal bli eit av Oslos signalbygg, så her bør ein snu i tide.

Byrådet vil truleg rette seg etter byantivkaren si tilråding om å gjere huset noko slankare og lavare., samt ta av to etasjar av bygget, som opprinneleg skulle vere 14 etasjar høgt.

Men dette held ikkje for Syversen i KrF. Han fryktar at bygget kan hamne i det samme uføret som statuen av kong Olav, som også møtte stor motstand , men som få torde å ta avstand frå før den så og seie var ferdig utforma.

- Eg er redd for at ein no har starta ein prosess som ikkje let seg snu, før ein ser kor gale dette ber av stad. Statuen kunne ein flytte på, det går ikkje med ei bygning.

Blir avgjort i august

Frp og kulturbyråd Torger Ødegårds parti Høgre som har byrådsmakta i Oslo, har ikkje fleirtal i bystyret.

Den endelege avgjerda kjem difor først over sommaren, når bystyret skal handsame saka.

Då vil byrådet si innstilling ikkje få støtte frå Hans Olav Syversen og KrF.

- Eg vonar at bystyret vil bruke god tid på dette, og sjå på bygget utifrå omgivnadane, og Operaen, som skal vere hovudbygget i området.

Venstre er positive

Venstre har foreløpig ikkje tatt stilling i saka. Men i følgje leiar i byutviklingskomiteen, Ola Elvestuen, kan det gå mot at Venstre støttar Høgre og Frp.

- Vi skal ta eit standpunkt i bystyret i slutten av august. Men det er nok ganske samstemt om at vi i utgangspunktet støttar juryens forslag.

- Venstre har vore eit av parti som har uttalt seg kategorisk negativt mot høghus. Korleis stiller det seg i denne samanhengen?

- Vi er kritiske til høghus, spesielt når det gjeld barcode-bygga i Bjørvika. Men vi har alltid meint at viktige bygg kan vere høge.