Når Oslo Fashion Week byrjar måndag 16. august, skal mellom anna Pia Haraldsen vise ein kolleksjon selskapskjolar ho har designa for brudesalongen Agape. I tillegg skal russedress.no lansere ein ny kolleksjon med
russeklede under Oslo Fashion Week.
Fleire kjende norske designarar kritiserer no haustprogrammet og synest at Oslo Fashion Week bør halde seg unna kommersielle aktørar.
– Folk er sjokkerte og trur at programmet til Oslo Fashion Week er ein spøk i år. Det er ikkje bra nok, ikkje profft nok, og veldig synd fordi Noreg har utruleg mange flinke designarar å by på, seier designar Kjersti Vatle.
- LES ÒG:
- LES ÒG:
– Meir naturleg på bryllaupsmesse
Designar Kjersti Vatle hadde visning under Oslo Fashion Week i februar i år, men denne gongen har ho valt å halde ei eiga visning i etterkant av moteveka.
– Det er ikkje noko gale i at Pia Haraldsen får vise fram kleda sine, men det er litt feil at ho gjer det på Oslo Fashion Week.
Vatle meiner at det hadde vore meir naturleg at kjolane, som er designa for brudekjolemerket Agape, hadde vorte vist på ei bryllaupsmesse.
- LES ÒG:
- LES ÒG:
Dei siste dagane har visninga av kolleksjonen til Pia Haraldsen og av russklede vore eit heitt tema i designbransjen, og fleire kjende norske designarar har reagert negativt på saka.
– Frå ein designar sin ståstad, som saman med eit tital andre norske designarkollegaer har blodslite i tiår for å oppnå kvalitet og kred hjå kundar og norske innkjøparar er det lite kredbyggjande å stå på same scene som slike aktørar. Det er likevel takka vere Oslo Fashion Week at fleire av oss har kome oss opp og fram, skriv designar Leila Hafzi i ein e-post til NRK.
Ikkje noko krav
Pål Vassbotten, direktør for Oslo Fashion Week, seier at det ikkje er aktuelt å stille krav om at alle som får ha visninger under moteveka må ha designarbakgrunn.
– Då måtte vi ha droppa Moods of Norway, og dei er per dags dato den største suksessen, så vi kan ikkje følgje den oppskrifta.
Han meiner derimot at det er lurt av Oslo Fashion Week å sleppe til Pia Haraldsen og Agape.
– Vi veit at det vil vekkje merksemd, så det er betre at vi går inn i eit samarbeid med Pia Haraldsen for å kunne kooridinere dette, slik at ho ikkje tek merksemd frå andre. Det vil gjere det er lettare for oss å sikre at alle vert sett, seier Vassbotten.
Marknadsføringstriks
Marianne Jemtegård, sjefredaktør for gratismagasinet Vixen, trur først og fremst at Oslo Fashion Week slepp til Pia Haraldsen fordi det gjev merksemd.
– Det er eit godt brukt marknads-føringstriks å få kjendisar til å fronte kolleksjonar, seier Jemtegård.
Om dette vil løne seg i lengda er ho derimot meir usikker på.
– Om det er bra for Oslo Fashion Week sin kredibilitet, for dei andre designarane og norsk motebransje er ei anna sak.
Må bestemme seg
Marianne Jemtegård meiner at Oslo Fashion Week må gjere eit medvite val om kva dei vil.
– Kva slags arena skal Oslo Fashion Week vere? Skal Oslo Fashion Week vere for butikkar og kjeder eller for frittståande designarar som viser fram kunstverka sine, spør Marianne Jemtegård.
Jemtegård trur visningane kan slå dårleg ut for truverdet til moteveka.
– På moteveka vil eg verte inspirert, sjå nye trendar og nye talent, det beste av norsk design. Det er ikkje resultatet vi endar opp med etter slike typar visningar, seier Jemtegård.
Kjersti Vatle synest at litt av eksklusiviteten har forsvunne, og at dette gjer det mindre attraktivt å delta på Oslo Fashion Week.
– Eg har store tvil om eg kjem til å delta igjen, på grunn av programmet i år.
Pia Haraldsen er på jobb i London, og har dermed ikkje moglegheit til å kommentere saka i dag.