– Sjølvsagt, det hadde eg heile tida. Men det kan ikkje brukast til noko når ein skal gjera det ein skal gjera. Så det måtte eg gløyma når eg gjekk inn, seier Mikkelsen til NRK.
– Forlet ikkje jorda i ein rakett
Den danske skodespelaren Lars Mikkelsen har som 50-åring fått det store, internasjonale gjennombrotet med nøkkelrolle som den russiske presidenten «Petrov» i den amerikanske Netflix-serien «House of Cards».
Men sjølv om hovudrolleinnehavarane Kevin Spacey og Robin Wright har gjort han litt «starstruck», tek han det heile med ro. Han karakteriserer dei som enormt søte og enormt generøse.
– Dei arbeider berre med noko, og så har det lukkast, og dei er «pissegode» til det, he he. Men det gjer ikkje at dei forlèt jorda i ein rakett, altså, seier han.
Artikkelen fortsetter under bildet
Inne i Mikkelsen sin store hjørneleilegheit på Vesterbro, heng vaskekleda på eit stativ, lokalavisa ligg på bordet, dei to kattane smyg seg rundt dørkarmane og ynglingsspelet hans står klart på dataen – litt som Frank Underwood i «House of Cards», som òg tek sine 'time-out-'spelepausar.
– Kokain og damer blir aldri meg
Men ellers er det lite som vitnar om glamour-livet i Netflix-suksessen for mannen som har mange år bak seg frå teateret.
– Haha, no kunne eg jo ha lege i eit hav av kokain og damer og ... Nei, det blir aldri meg. Eg har jo familien min og livet mitt, og eg er veldig basert i teateret og det litterære. Og det kan eg ikkje forlata, sier Mikkelsen til NRK.
- LES OGSÅ:
Som ellers er tilfellet i serien, er det klare parallellar mellom rolla hans som «Petrov» og røynda, Russland sin president Vladimir Putin – men det stoppar der.
– Denne figuren skulle kunna kommunikera på engelsk, og det kan Putin slett ikkje. Og så er eg mykje høgare, Petrov er mykje meir ein verdsmann enn Putin er. Putin er lukka og veldig kjølig, seier Mikkelsen.
Mikkelsen er òg aktuell med hovudrolle i den europeiske TV-serien «Mord utan grenser», som går på NRK. Mikkelsen håpar at Noreg vert representert i serien på eit tidspunkt.
– Føtene på jorda
– Når me har sett svenskane, har me tenkt: Å, kor er dei gode. Og svenskane tenkjer litt det same om oss. Og no er det nordmennene som er gode. Når me kikkar over grensene, så kan ein sjå eitt eller anna som ein ikkje kan sjå om seg sjølv.
- LES OGSÅ:
«House of Cards»-sukssen har ikkje gjort han rik, og han er nøgd med å bu i ei andels-leilegheit med kona, to søner og to kattar. Å dela ein båt med vener og eiga ein bil. Og ellers ta livet som det kjem med teater, biljard på det lokale vertshuset og moglegvis fleire internasjonale roller etterkvart.
Men han er nøgd med at det ser ut som om folk synest han har gjort ein god jobb i «House of Cards».
– Eg prøver å halda føtene på jorda, og det har jo heller ikkje skjedd så veldig mykje anna enn at det ser ut som om eg har gjort arbeidet mitt skikkeleg, seier Mikkelsen.