Hør:
I seks veker inntok regissør Richard Fleischer med følge Maurangsnes. Nesten alt som kunne krype og gå i området deltok, anten som statistar, som båtførarar, eller ved å låne ut fjordingen sin til ei filmstjerne.
No, 50 år etter, vert statistar og roarar kalt inn igjen, det skal lagast ein fransk dokumentar om då Hollywood kom til Hardanger.
Norske statistar
I Fyllingsdalen bur ei eldre dame som kan sjå attende på eit langt og rikt liv. Sommaren 1957 hugsar ho godt.
Fordi 24-åringen frå Nordheimsund kunne engelsk fekk ho jobben som bindeledd mellom produksjonsselskapet og bøndene i området. I ein flott amerikanar og med eigen privatsjåfør samla Berit Wollan inn utstyret som trengtest til filminnspelinga. Sidan blei ho med i filmen, både som statist og som stand-in. Men filmen har ho berre sett ein gong, i 1958. Ho trur det var i Bergen.
Klassisk innhald
På Maurangsnes i Kvinnherad kommune bygde produksjonsselskapet opp ein heil vikingelandsby, og fleire vikingeskip blei snekra saman til innspelinga. Roarane var både danske og norske, Berit Wollan meiner å hugse at nokon av dei kom frå Fana Roklubb utanfor Bergen.
50-talet blir hugsa for sine episke storfilmar, som Dei ti bod, Spartacus og Ben Hur. 'The Vikings' blei den fyrste store vikingefilmen, og i åra som kom dukka det opp både TV-seriar og filmar om livet i vikingetida.
Filmen blei ein kinosuksess, og den har fans den dag i dag.
Ønsker kontakt med nordmenn
'The Vikings' er favorittfilmen til den franske dokumentarfilmprodusenten Stéphane Chevalier. Filmen har fascinert han sidan han såg den fyrste gong som liten gut, og no ynskjer han å lage ein dokumentar om innspelinga. Filmen blei spelt inn i fleire land, og for å komme i kontakt med dei som deltok i Norge har Chevalier kontakta den franske ambassaden. Konsulatet i Bergen kontakta Bergens Tidende, og eitt døgn etter artikkelen stod på trykk hadde 20 personar meldt seg, blant dei Berit Wollan.
Stéphane Chevalier veit at Martin Scorcese er veldig glad i 'The Vikings', og franskmannen vil prøve å få til eit intervju med filmlegenden. Men til Norge kjem Chevalier uansett, alt tidleg neste år håpar han å kunne intervjue nokre av dei som deltok under, eller var vitne til innspelinga i 1957.
Var du ein av dei kan du kontakte visekonsul ved Frankrikes konsulat i Bergen, Arnhild Jebsen, på telefon 930 26 856.
Hør:
Norgesglasset NRK P1