I august blir ein tilleggspakke til det kjende dataspelet «Age of Conan» sleppt, samtidig med premiera på Hollywood-filmen «Conan The Barbarian».
Det norske selskapet som står bak spelet, Funcom, har jobba tett saman med skaparane av filmen. Det tyder at du vil kunne slåst mot monstera du ser i filmen, med våpena som blir brukt. Også hovudrollene, stadane og historiene frå filmen vil ha ein sentral plass i spelet.
Filmen er i 3D og i hovudrollene finn ein Jason Momoa, Rose McGowan, Stephen Lang, Ron Perlman, Bob Sapp og Rachel Nichols i rollene. Regissør er Marcus Nispel.
Les også:
– Fekk lese filmmanus
Eventyrpakken, som har fått namnet «The Savage Coast of Turan», byrjar 20 år etter historia i filmen. Den gir spelarane moglegheit til å fortsette filmhistoria i Conan-riket.
Tilleggspakken vil bli tilgjengeleg for nedlasting for spelarar over heile verda, opplyser kommunikasjonsdirektør i Funcom, Erling Ellingsen, til NRK.no.
– Vi har hatt eit nært forhold til lisenshavarane av Conan heilt sidan 2003, då vi byrja å jobbe med det første spelet. Det er naturleg for oss å samarbeide med dei. Vi har fått lese manus og snakka med dei om innhaldet i filmen, seier Ellingsen.
(Artikkelen held fram under biletet)
Brukte dataskisser i filmarbeidet
Han meiner filmselskapet Lionsgate også har interesse av å samarbeide med Funcom.
– Dei er interessert i å nå publikummet som følgjer spelet vårt, det er den same målgruppa. Filmskaparane har brukt teikningane vi brukte i arbeidet med spelet for å få filmen så korrekt som mogleg, seier Ellingsen.
Den originale Conan-bokserien har heile tida vore hovudinspirasjonen bak dataspelet, men Funcom har også sett på teikneseriar og Conan-filmar.
– Vi har jobba tett saman med Funcom sidan 2003 og laga noko som gir ei unik kjensle av Conan-verda, seier produsent for filmen og direktør i Paradox, Fredrik Malmberg, i ei pressemelding.
Les også: