September er årets nynorskmånad på Twitter for NRKbok, og me samarbeider derfor med den frittståande Twitter-redaksjonen for #nynov, som engasjerer folk til å skrive kort-noveller kvar månad.
Månadens temaord er «ingen»
Temaordet for september er «ingen». Dermed er utfordringa gitt: skriv ei kort-novelle med emneknaggen #nynov og trykk på den lyseblå tweet-knappen.
Den einaste rettesnora du har, ut over dei rammene formatet gir, er temaordet.
Og er du som underteikna, ein som alltid grua seg til å skriva nynorskstil på skulen, er det berre til å finne fram ordboka og prøva så godt du kan.
Lukke til!
Starta i 2013
#Nynov fekk nytt liv i februar i år, etter at fleire etterlyste det, fortel initiativtakar Per Roger Sandvik.
Foto: Privat#Nynov blei tatt i bruk i 2013 då Deichmanske inviterte til skrivetevling på Twitter. Prosjektet vart støtta av stiftinga Fritt ord, og hadde Språkåret 2013 som ein viktig støttespelar. I tillegg var Samlaget rause og delte ut bokpremiar til alle delvinnarane.
Mannen bak ideen, Per Roger Sandvik, fortel at konseptet fekk ei enorm merksemd.
– Gjennom seks rundar kom det inn over 3 000 bidrag frå 500 unike Twitter-kontoar, seier han.
– Sakna ein publiseringsarena
Då tevlinga tok slutt, var det fleire som etterlyste eit framhald, seier Sandvik:
– Det kom fleire og fleire signal på at Twitter-folket sakna ein stad å publisere korttekstane sine. Difor fekk emneknaggen #nynov nytt liv i februar i år, men utan tevlingsaspektet.
Kvar månad sidan då, har Twitter-brukarar halde fram med å publisere alle slags kort-noveller på nynorsk. Den frittståande nynov-redaksjonen, beståande av Synneva Erland, Rita Mundal, Arinfinn Ski og Per Roger Sandvik, har halde det heile i gong.
Denne månaden er altså NRKbok med på leiken, og i den anledning vart det likevel høve for dei som likar smaken av tevling. I byrjinga av oktober vil ein kompetent jury kåra dei ti beste bidraga som vart skrivne i september.
