Blanda mottaking for «Skam»-teater

Danskane elska «Skam» som tv-serie. Norsk ungdomsliv gjorde at danske ungdommar byrja å bruke norske ord og uttrykk, og serien blei både sak i Nordisk ministerråd, og fekk språkpris for å auke språkforståinga på tvers av landegrensene i Norden.

I april blei det kjent at teateret Aveny-T i København hadde skaffa seg retten til å lage teater av serien. Det skal lagast i alt fire teaterframsyningar basert på TV-serien. Fredag var det premiere på det første stykket.

Vellukka overgang

Danske teatermeldarar er delte i kor vellukka overgangen frå TV til teater er. Henrik Lyding i Jyllands Posten gir framsyninga fem stjerner (betalingsteneste), og skriv at transformasjonen er meir enn vellukka.

– Dramatikaren Line Mørkeby har konsentrert første sesong av serien til halvannan times fortetta, underhaldande og rørande ungdomsteater, skriv han.

Henrik Queitsch i Ekstrabladet er like oppglødd, og gir også fem stjerner til framsyninga, som han oppmodar alle til å sjå framsyninga, uansett om folk har sett serien eller ikkje.

– Du treng ikkje ein gong vere ung. Berre det at du har vore det ein gong, gjer at du vil finne noko å kjenne seg igjen i.

• Les: Anmeldelse: – Hold keft, hvor du er smuk

Også Berlingske gir tommel opp, og skriv at oppdraget har lukkast (betalingsteneste). Medan danske BT skriv:

– «Skam» som teater er så forbanna godt, at ein skulle tru det var løgn.

Coverband-teater

Men andre teatermeldarar i Danmark kan styre begeistringa si for teaterprosjektet. Avisa Information skriv at teaterversjonen av «Skam» ikkje er ei kunstnarisk bragd, men ei påminning om ein serie mange elska.

– Det var som å vere på ein konsert med eit coverband, som framfører kjente nummer utan den virtuositeten og originaliteten som fekk ein til å elske dei i første omgang, skriv Lone Nikolajsen.

Ho får følge av Kizaja Ulrikke Routhe-Mogensen i Politiken (betalingsteneste) som meiner teaterversjonen er ein flat kopi av originalserien.

– Dei ønsker å trekke unge til teateret og treffe dei der dei er. Men dersom ein ender med å gi dei ei oppleving av at teateret er ein flat kopi av TV, kva er då poenget? Og kva om ein slett ikkje har forstått kvar dei unge er?, skriv ho i ei teatermeldings om får tre stjerner.

Teaterversjonen av sesong to kjem i april neste år.