NRK anmeldte kveldens finale låt for låt: Les anmeldelsane her!
Bilal Saab vann Stjernekamp med låten «Castle on the Hill» med den britiske songaren Ed Sheeran.
– Eg trur ikkje eg det er ei nerve igjen i kroppen, alt er berre øydelagt. Eg er strålandes fornøgd og så sjukt takksam at eg har ikkje ord, sa Bilal Saab til NRK rett etter at finalen var over.
– Kva er det med den nordnorske krafta? Ella Marie i fjor og deg i år.
– Det er enkelt og greitt den beste delen av verda når det kjem til å vere patriotar og å heie kvarandre fram.
LES OGSÅ:
– Korleis har du tenkt å utnytte denne sigeren?
– Eg skal satse hardt saman med bandet mitt NorthKid. Vi skal gje ut mykje ny musikk utover nyåret og vi skal spele mange konsertar til våren og neste sommar. Men før det er det ein liten pause. Eg skal ha eit par veker heime i senga i kokroleg sjøstjernepositur, som eg kallar det, sa Bilal.
Kim Rysstad blei slått på målstreken, men følte han hadde vunne likevel.
– Eg føler eg har vunne den største kampen, og det er den sjølvtilliten som gjer at eg tørr å stå her, sa Kim Rysstad.
– Fødd til å gjere dette
Etter Bilal si aller siste framføringa i årets Stjernekamp let ikkje tilbakemeldingane frå dommarane vente på seg.
– Du song som ein Gud frå første augneblink. Vi ser korleis du har vakse. Du må diverre synge for folk heile tida, sa Mona B. Rise.
– Du er fødd til å gjere dette, utan tvil. Du har hatt ei så fantastisk reise her i Stjernekamp, det har vore ein fryd å følgje med på deg. Eg er så glad på dine vegne, sa kveldens ekspertdommar og fjorårets Stjernekamp-vinnar, Ella Marie Hætta Isaksen.
– Stort spenn mellom finalistane
Artistane har vore gjennom 13 ulike sjangrar i Stjernekamp. I dag skulle det avgjerast kven som meistrar flest sjangrar.
I finalen var kvedaren Kim Rysstad (38) frå Setesdal i Aust-Agder og Bilal Saab (20) frå Sørøya i Finnmark.
– Aldri har det vore større spenn mellom to finalistar, sa dommar Thomas Feldberg før finalen.
Finalelåten skulle sette punktum for årets Stjernekamp. Som finalelåt valte Kim ein artist han har beundra i mange år: Whitney Houston og låten «I look to you».
– Det er så voldsomt å sjå den sterke, glade Kim. Du er sterk som juling. Du har gitt alt, sa Mona B. Rise etter opptreden.
– Når du syng songen med den overbevisninga du har, så overbeviser du meg. Dette kler deg Kim. Dette kan du gjere mykje meir av, sa Thomas Feldberg.
Imponerte med eigne songar
Som eigen låt valde Kim «Så vidunderleg». Ei vise skriven av Elin Nygård. Sist Kim Rysstad song den same songen var då han var deltakar under Melodi Grand Prix i 2012.
– Det har skjedd noko med deg som menneske og songar. Du har gått frå kvedar til artist. Det er ingen hindringar for kva du kan gjere vidare Kim, sa dommar Thomas Feldberg.
Bilal hadde med bandet sitt NorthKid på framføringa av songen «Done Fighting».
– Magisk reprise
Kim Rysstad valte reprise frå program nummer to i sjangeren Melodi Grand Prix. Han song «Rise Like a Phoenix» som opphavleg blei framført av den austerrikske artisten Conchita Wurst, ei kvinne med skjegg.
– Det her var berre helt magisk, sa Ella Marie Hætta Isaksen etter framføringa.
Fekk overtenning av «Nordaførr»
Bilal hadde valt reprisen «Nordaførr» av RSP & Thomax frå program fem i sjangeren hiphop.
– Eg fekk heilt overtenning her no. Eg er ganske sikker på at det ikkje finst ei nordnorsk sjel der heime som ikkje er umenneskeleg stolt av deg Bilal, sa Ella Marie Hætta Isaksen.