Prins Albert og nybakt prinsesse Charlene ga kvarandre sine ja i Monaco i dag. Brudekjolen var dekt med 40.000 swarovskikrystallar, 20.000 perler og 30.000 steinar.
Les:
Men bruda var ikkje den einaste som imponerte med stilriktig og fantastisk antrekk. Designar Wenche Lyche, som mellom anna stod bak brudekjolen til prinsesse Märtha Louise i 2002, har vurdert antrekka for NRK.no.
Nordiske kongelege får tyn
Kronprins Haakon og kronprinsesse Mette-Marit representerte Noreg i bryllaupet. Han var kledd i Sjøforsvarets galla, medan kronprinsesse Mette-Marit hadde valt knelang kjole i beige, med oppsatt hår med blomar i.
Wenche Lyche karakteriserer antrekket til kronprinsesse Mette-Marit som «for vaksent».
– Kjolen er i litt for tjukt stoff. Eg syns godt ho kunne brukt ein kjole i eit tynt, sensuelt stoff, som silke eller chiffon. Dette blir litt for stødig, det er jo sommar og lov å bruke luftige stoff. Men fargen er rålekker, kronprinsessa er flott i bleike tonar, seier Lyche.
Les alt om bryllaupet:
Ho var derimot svært nøgd med antrekket som kronprinsessa hadde på seg under middagen fredag, etter den borgarlege vigselen.
Kronprinsessa er ikkje den einaste som har kledd på seg litt for mykje. Dronning Silvia var kledd i knallilla kjole og hatt, med brosje på. Ho har bomma med antrekket denne gongen, meiner Lyche.
– Ho er som regel alltid pent kledd. Stoffet i denne kjolen er for tjukt til sommaren, det blir for påkledd. Men formen og fargane er lekre, vurderer Lyche.
– Charlotte Casiraghi tar kaka
Fleire av gjestane var kledd i pastellfargar. Wenche Lyche meiner Charlotte Casiraghi, dotter til prinsesse Caroline, treff blink med sitt pastellantrekk.
– Det tar heil kaka! Det svarte sløret foran ansiktet er superkult. Det minner meg faktisk litt om Grace Kelly. Ho er rett og slett den nydelegaste av dei alle. Kjolen er kjempeflott, med svarte band på, og svart veske og sko til, seier ho.
Prinsesse Stephanie, tante til Charlotte, får skryt for kjolen sin:
– Ho er veldig kul i den bleikrosa kjolen. Også borna hennar har gått for pastellfargar, seier Lyche.
På andreplass etter Casiraghi kjem Naomi Campbell, som kom i lang blomstrete kjole med hatt til.
– Naomi Campbell er griselekker. Ho er så flott, nesten som ei gudinne, seier Lyche.
Sjå fleire av gjestane her
Svenske prinsesser får skryt
Begge dei svenske prinsessene, Victoria og Madeleine, får skryt for sine antrekk.
– Kronprinsesse Victoria er kjempesøt og kler seg heilt etter alderen og stilen sin. Ho er veldig flott i korte kjolar og fargen er veldig fin. Det er sommarleg og friskt, seier Lyche.
Ho meiner prinsesse Madeleine også er kjempesøt:
– Ho er kul og «casual», med ei lita fjøyr på hovudet. Kjolen er spanande, ung og frisk, seier Lyche.
Mange kjendisar til stade
Kronprinsesse Mary skilte seg ut i sjøgrøn kjole blant alle pastellane.
– Det er ein kjempekul kjole i sjøgrøn sateng, med ein kul hatt til. Du kan sjå at ho elskar å kle seg, ho ser alltid bra ut. Også kronprins Frederik ser bra ut, i raud brokadevest, seier Lyche entusiastisk.
Fleire kjendisar var til stade, mellom anna Chanel-designar Karl Lagerfeld, filmstjerner og modellar. Sexsymbolet Victoria Silverstedt kom i kremfarga kjole og hatt.
– Ho er ei sexy dame, men dette antrekket var ikkje så veldig kult. Hatten står for langt bak på hovudet, seier Lyche.
Gjestane skiftar antrekk før gallamiddagen i kveld og det er allereie varsla at bruda også her vil kle seg i Armani Privé. Du kan også sjå kveldens antrekk på NRK.no.
Kva antrekk meiner du var best og verst? Diskuter her!