Beckham: Vi er sterkare i EU

Torsdag 23. juni røyster britane om Storbritannia skal bryte ut av EU eller ikkje. Valkampen har vore intens og med tida har kjendisane stadig fått ei større rolle i debatten.

Det er ingen samla kjendistropp som står bak statsminister David Cameron når han oppmodar britane om å stemme for å bli.

På den eine sida blir det sagt at eit Storbritannia utanfor EU mellom anna vil bety at fotballen blir betre, at landet ikkje lenger er styrt av eit korrupt diktatur og at dei endeleg kan få nytta «skikkelege» lyspærer.

På bli-sida blir det derimot hevda at Storbritannia er sterkare saman med EU og at innvandring kan føre til mykje godt – mellom anna skodespelaren Idris Elba.

Bli-kjendisane:

Benedict Cumberbatch

Saman med 250 andre kjendisar har skodespelaren signert eit brev som oppmodar Storbritannia om å bli i EU. I brevet som mellom anna er omtalt i The Guardian står det at «Storbritannia er ikkje berre sterkare i Europa, det er også meir fantasifullt og kreativt, og vår globale kreative suksess ville bli sterkt svekka om vi forlèt EU». Skodespelarane Helena Bonham Carter og Jude Law har også signert brevet.

J.K. Rowling

Harry Potter-forfattaren vil røyste for å bli og har samanlikna meiningsmotstandarane sine med monster. Ho har mellom anna twitra ein tekst om EU-debatten under teksten «Eg er ikkje ekspert på mykje, men eg veit korleis ein skapar eit monster».

Jeremy Clarkson

Ifølgje The Mirror har den tidlegare Top Gear-programleiaren skal ha uttalt at «Storbritannia har lita påverknad på verda. Det trudde eg vi alle var einige om».

David og Victoria Beckham

Det profilerte ekteparet fekk mykje merksemd då dei støtta bli-kampanjen i sosiale medium. Det heile starta då David Beckham publiserte eit lengre innlegg der han mellom anna skreiv at «som eit folk er vi sterkare når vi står saman».

Idris Elba

Skodespelaren delte ein video på Twitter av den skotske politikaren Alex Salmond som sa at han var lei av korleis innvandring ofte er framstilt som noko negativt med kommentaren «Foreldra mine innvandra til Storbritannia, jobba hardt og har bidrege med … MEG … på det grunnlaget stem for Å BLI».

Stephen Hawking

The Mirror skriv at fysikaren treng meiner at Storbritannia å vere ein del av ei større gruppe med nasjonar, både for tryggleik og handel. Han har også lagt vekt på at EU-medlemskapet gjev fordelar når det kjem til utdanning og forsking.

Alexa Chung

Modellen som har 2.3 millionar følgjarar på Instagram, poserte som berre ein modell kan under teksten «I'm IN».

Andre som støttar bli-sida: Barack Obama, Arsène Wenger, Sir Elton John, Bobby George, Gordon Brown, Jeremy Corbyn, Bill Nighy, Sir John Major, Sir Richard Branson, George Osborne, David Cameron, Lilly Allen, Nick Clegg, Keira Knightley, Sir Ian McKellen, Dominic West, Simon Cowell, Cara Delevingne.

Ut-kjendisane

John Cleese

Komikaren ytra på Twitter at han er for Brexit, mellom anna fordi Europa treng Storbritannia meir enn Storbritannia treng EU.

Katie Hopkins

Aviskommentatoren Katie Hopkins har ifølgje The Huffington Post uttalt at ho «ikkje kjem til å opne gjesterommet for flyktningane. Eg står for det britiske folket og vel sette det britiske folket først».

Elizabeth Hurley

Ifølgje Huffington Post er Hurleys hovudargument for å støtte ut-kampanjen er at ho meiner at ein «Brexit» betyr at britane kan «gå tilbake til skikkelege lyspærer og velje kraftige hårfønarar eller støvsugarar om dei ønskjer det».

Joan Collins

Dynastiet-skodelspelaren har fleire gonger publisert sitt standpunkt om EU-medlemskapet på Twitter.

Sol Campbell

Britisk fotball kjem til å bli mykje betre utan EU, skal ein tru den tidlegare kapteinen for det engelske fotballaget Sol Campbell. Han argumenterer for at ein utmelding frå EU betyr at Premier League i større grad må dyrke britiske talent. Ifølgje Mail Online skal han ha sagt at dersom Storbritannia vil ha fleire britiske fotballstjerner, må Storbritannia «ta tilbake kontrollen».

Andre ut-kjendisar: The Italian Job-skodespelar Sir Michael Caine, Downton Abbey-skaparen Julian Fellowes, Julian Assange, Donald Trump, Elaine Paige, David James.