Aurora plantar eit tre for kvar kjøpte plate

Det fortel popstjerna frå Os når ho gjestar Lindmo denne veka.

Aurora har tidlegare uttalt til NRK at ho har eit djupt og spirituelt forhold til naturen, og at klimakampen er ei av dei største hjartesakene hennar:

– Vi gjer så mykje som er med på å drepe jorda. Det er hjarteknusande at det har gått så langt på grunn av grådigheit.

– Men det er veldig inspirerande å sjå at det finst så mange menneske som vil gjere noko godt for verda også, sa ho til NRK i haust i forbindelse med FNs klimatoppmøte.

Sjølv bidreg ho med å lage ein miljøskog i Sør-Amerika.

– Eg pleier å plante eit tre i ein skog eg lagar i Sør-Amerika, eit tre for kvar plate folk kjøper. Framgang skjer med alle individ som bidreg. Då lagar vi ein Aurora-skog, seier ho til Lindmo.

– Det uperfekte kan vere det perfekte

Aurora Aksnes er ein av Noregs største popartistar med låtar som er strøyma over ein halv milliard gongar. I tillegg har ho millionar av følgjarar på Instagram og TikTok.

Nå er ho aktuell med fjerde plate som NRKs kritikar meiner er ein imponerande affære.

I albumet, som er titulert «The Gods We Can Touch», adresserer ho mellom anna klimakamp og retten til å elske den ein vil.

I Lindmo fortel ho at ho har henta mykje inspirasjon frå gresk mytologi.

– Eg er fascinert av det menneskelege og det guddommelege, og at vi tenkjer på det som to ulike ting.

– Eg er ganske skamfri

25-åringen fortel at ho har tenkt mykje på menneske som gjennom historia har blitt fråteken fridomen til å vere den dei er.

Ho peiker på at det som bør bli sett på som naturleg og nydeleg ofte har blitt skamlagt.

Derfor resonnerer ho til den greske mytologien fordi den er aksepterande for vår menneskeleg oppførsel.

– Det var ikkje noko feil å vere kvinne, homoseksuell, seksuell, naken, nyte vin, vere transvestitt. Dei hadde mykje framgang vi har mista litt på vegen. Det verkar som framgang er når flest menneske har det bra. Det er bra å vere fri i seg sjølv. Og ikkje skamme seg.

– Klarer du det? spør Anne Lindmo.

– Eg er ganske skamfri. Det gir ikkje meining å skamme meg for å vere nysgjerrig, fri, annleis eller teit. Viss det er ein del av å vere meg og menneske, er det ikkje naturleg å skamme meg over.

På grunn av prinsesse Ingrid Alexandras bursdag blir Lindmo sendt lineært laurdag kl. 21.25 på NRK 1. Eller du kan sjå Lindmo når som helst i NRK TV.

Sjå dokumentaren om Aurora her: