Arkeologar har funne ei over 3000 år gammal gullmaske i Kina

Over 500 gjenstandar er funne i ei utgraving i Sichuan-provinsen i Kina. Blant det som er funn er restane av ei over 3000 år gammal gullmaske.

Gullmaske funent i Kina

Gullmaska som blei funne i Sinchuan er truleg over 3000 år gammal. Utrekningar viser at ho kan vere laga av 84 prosent gull.

Foto: Chinaculture.org

Maska har sannsynlegvis vore brukt i seremoniar, og veg rundt 280 gram. I alt er det funne over 500 gjenstandar i utgravinga i Sanxingdui utanfor provinshovudstaden Chengdu i Kina, skriv CNN.

I tillegg til gullmaska er det funne fleire gjenstandar i bronse, elfenbein og jade. Det er også funne ei uopna trekasse og eit sjeldan bronsekar.

Utgravinga starta i oktober 2019, og blei nyleg avslutta.

Ekspertar meiner funna kan kaste nytt lys over oldtidsstaten Shu, der Sanxingdui truleg var hovudsetet. Shu var sjølvstendig fram til dei blei erobra i 316 før Kristus.

Mange funn

Det er uvisst når Shu-riket blei etablert, men gjenstandar som er funne tidlegare er truleg opp mot 4000 år gamle. Mange av gjenstandane er utstilte på museet i Sanxingdui.

Det store gjennombrotet for dei som har forska på oldtidsstaten kom i 1986. Då blei det funne over 1000 gjenstandar i ei stor utgraving. Blant det som blei funne den gongen var ei godt bevart bronsemaske.

Sjeldent bronsekar i Kina

Blant funna som blei gjort på utgravingsplassen denne gongen, var dette sjeldne bronsekaret. Tidlegare er det også funne godt bevarte bronsemasker i området.

Foto: Chinaculture.org

Dei mange funna i området har ført til at historikarar har måtte endre synet på korleis den gamle kinesiske sivilisasjonen utvikla seg.

Ikkje på verdsarvlista

Utviklinga i Shu-staten har truleg gått uavhengig av utviklinga i andre samfunna rundt Huang-elva, som tradisjonelt blir rekna som vogga til den kinesiske sivilisasjonen.

– Dei nye funna gir ein rikare og djupare forståing for kulturen i Sanxingdui, sa Song Xinchao, som er visedirektør i Kinas kulturminneforvaltning, til det statlege telegrambyrået Xinhua.

Figur i elfenben funnet i Kina

Arkeologane i Kina fann blant anna øydelagde figurar i elfenbein i utgravingane.

Foto: Chinaculture.org

Det er også funne silkefiber og stoffrestar som kan tyde på at området var ein viktig stad for silkeproduksjon i det gamle Kina.

Sanxingdui står framleis ikkje på verdsarvlista til Unesco, men er blant stadane som er til vurdering. Men organisasjonen seier at saman med andre funn frå Shu er staden ein viktig representant for bronsealderen i Kina, Aust-Asia og til og med i verda.

Kulturstrøm

  • Slutt for Senkveld på TV 2

    Etter 20 år er det slutt. Aller siste Senkveld sendes på TV 2 den 21. mai. Programmet ble fra 2003 og til 2018 ledet av Harald Rønneberg og Thomas Numme. TV 2s programredaktør Kathrine Haldorsen sier til NTB at kanalen nå skal fornye seg.