– Eg synest også at det er flaut å spele teater eller film. Det er flaut! Det ligg i virkets natur, seier Ane Dahl Torp med eit stort smil om munnen.
Det er i fredagens sending av Lindmo at skodespelaren innrømmer at heller ikkje ho er utan sommarfuglar i magen når ho skal spele ei scene.
– Eksempelvis: «Nå er eg liksom forelska. Nå skal eg gråte». Det er jo litt teit. Men viss ein liker den flauheita litt, då kiler det litt på innsida.
– Eg synest det er litt flaut kvar dag eg. Men eg er vand til det, og veit å nyte det, legg ho til.
– Det er som om eg har vunne Oscar
Ane Dahl Torp er kjent frå både teater, film og TV og har blitt løna med fleire prisar for sine rolletolkingar. Sist vi såg ho på norske skjermar var som fotballtrenaren Helena Mikkelsen i serien «Heimebane».
Førre måndag vann ho Sveriges fremste filmpris, nemleg «Guldbaggen», for beste kvinnelege hovudrolle i den svenske dramafilmen «Charter».
Filmen har fått strålande kritikk, og er også vald som Sveriges kandidat til Oscar-utdelinga i kategorien «beste internasjonale spelefilm».
– Det kjennest heilt fantastisk ut. Sverige er mitt Hollywood, det er som om eg har vunne Oscar, seier ho.
For Torp var det ekstra stas å vinne pris i Sverige då ho alltid har hatt ein forkjærleik for Sverige krydra med litt ambivalens.
– Det er noko med den svenske kulturen som eg synest er interessant, og som irriterer meg litt samtidig. Eg har eit uavklart forhold der.
– Det er ein fortent pris
Inger Merete Hobbelstad, teater- og filmmeldar i Dagbladet. Ho seier det er ein fortent pris som også viser at Noreg har eit koppel med internasjonalt anerkjente skodespelarar.
– Tradisjonelt har det vore sett på som eit problem at norske skodespelarar fyrst og fremst var teaterskodespelarar, og at dette syntest når dei spelte på film. Dette er ikkje noko problem lenger.
Ho skryter av korleis Ane Dahl Torp er god på å formidle intensitet, og seier at dette er ei intens rolle.
– I denne filmen må ho dessutan få sjåaren til å lure på om ho snakkar sant eller ikkje. Det får ho til veldig godt.
Vidare nemner ho også Andrea Bræin Hovig og Pia Tjelta. Begge har vunne internasjonale prisar det siste året.
– Det var eit godt år for norske skodespelarar, seier ho.
– Eg verka som ein total «weirdball»
Utdelinga og takketala som følgde med «Guldbaggen» gjekk derimot ikkje heilt smertefritt.
– Apropos flaut! Eg er så flau over den takketala mi, seier ho og ler.
Takketala måtte bli laga som digital videohelsing, noko Torp var skeptisk til i utgangspunktet.
Ho fekk ein idé der ho førestilte seg korleis ho hadde gjort det om ho var i Sverige, og vart ropt opp på scena. Og så spelte ho ut dette i videohelsinga.
– Og så byrjar programmet og eg skjønner at eg hadde bomma heilt. Då sat eg der og var flau under heile «Guldbaggen», og tenkte at no kjem snart helsinga mi som ser ut som eit TV-program. Eg kom over som ein total «weirdball», avsluttar ho og ler.