Bøker, filmar og spel som gir feriestemning

Sosiale medium er framleis fulle av feriebilete, men hos deg ringer vekkarklokka brutalt kvar morgon, ein ny arbeidsdag ventar og sommarferien er berre ein fjern draum.

Bli ikkje motlaus av den grunn: Her er tips til tre bøker, tre filmar og tre spel som kan ta deg på imaginære feriereiser.

FERIE I TEKSTVERSJON

Om du vil at feriekjensla skal vare lenge, kan ei bok som tek deg ut i verda vere eit godt val.

Timianvind på Kreta

• Reisemål: Hellas
• Bok: «Kreta-døgn» av Tove Nilsen

Tove Nilsen si kjærleikserklæring til den største av dei greske øyene byrjar med ei heimvend gymlærarinne som prøver å få elevane til å danse Zorba. Allereie i taxien på veg inn til hovudstaden Chania blafrar timianvinden bedageleg over boksidene. Vi blir kjent med restauranteigaren som manglar kundar, vi køyrer på biltur til ein bortgøymd landsby for å besøke den eldste kvinna på øya og blir gjestfritt servert lokale rettar rundt kvart hjørne.

Lukt og smak av India

• Reisemål: India
• Bok: «Balansekunst» av Rohinton Mistry

Rohinton Mistry sin prislønte og store – på så mange måtar – roman «Balansekunst» er ei reise i Indias nyare historie. Frå frigjeringa i 1947 til unntakstilstanden i 1975. Ein nydeleg, brutal, sanseleg, fargerik og forrykande roman, akkurat som India sjølv. Handlinga er frå Mumbai og gjennom fire hovudpersonar blir det komplekse indiske samfunnet bretta ut. Og frå kvar side siver det lukter og smakar; chili, curry og chai.

Intens, ung kjærleik

• Reisemål: Italia
• Bok: «Og ditt navn er mitt» av André Aciman

Dette er sommarromanen sin! Den 24 år gamle amerikanaren Oliver jobbar ein sommar som assistent for ein fransk professor i eit gammalt hus på den italienske rivieraen. Sonen i huset, 17 år gamle Elio, fell hardt og djupt for den flotte amerikanaren. Han blir pint av lengsel gjennom dagar fylt med jogging, bading, tennis og seine middagar med italiensk mat og vin. Kvar einaste side i boka syd av ungdommeleg begjær og av den skjellsetjande opplevinga det er å finne sjelevennen sin.

LES: 18 boktips for sommaren.

FERIE I FILMVERSJON

Vi held fram der vi slapp bøkene, og anbefaler rett og slett også den Oscar-vinnande filmatiseringa av romanen frå Nord-Italia:

Svulmande hjarte

• Reisemål: Italia
• Film: Call Me By Your Name (2017)

Ei aldeles nydeleg kjærleikshistorie lagt til sommarferien 1983 og landlege omgivnader i Nord-Italia. Filmen har så mange flotte skildringar av ungdommeleg kjensleliv, at hjartene berre må svulme. «Call Me By Your Name» er ein av dette tiårets varmaste filmromansar – med ekte sommarstemning frå Italia.

Stillehavs-eventyr

• Reiserute: Frå Peru over Stillehavet til Polynesia
• Film: Kon-Tiki (2012)

Ein eventyrleg film i episk format som plasserer oss om bord på ei balsaflåte på Stillehavet. Den gir oss eit betre inntrykk av korleis ferda til Thor Heyerdahl og mannskapet må ha fortona seg. Filmen er imponerande flott filma, med glimrande visuelle effektar, nydeleg filmmusikk og ei fortreffeleg samling skodespelarar som gestaltar mannskapet om bord.

Litt skadefryd?

• Reisemål: Ein badeby i USA
• Film: Haisommer (1975)

Er du misunneleg på alle som kan henge på stranda og bade, medan du er på jobb; sjå denne! Dette er den ultimate sommar-thrilleren, signert regissør Steven Spielberg. Badeskrekken blir ikkje meir klassisk enn dette, og det kan hevdast i fullt alvor at dette framleis er ein av de beste thrillerane som nokosinne er laga. Haien verkar framleis.

LES: 13 perfekte sommarfilmar

FERIE I SPELVERSJON

I spela er alle grenser er opne, sjølv verdsrommet er mogleg feriedestinasjon.

Ditt eige ferieparadis

• Reisemål: Ei aude øy
• Spel: Animal Crossing: New Horizons
• Plattform: Switch

Her flyttar du inn på ei aude øy, og jobben din blir å forvandle den til eit vakkert ferieparadis. Inntil tre personar kan dele same øy og samarbeide om å lage parkar, butikkar, eit stort museum, plante blomster, fiske hai, samle insekt, finne fossil osb. Den ultimate chill-opplevinga.

Ferie under vatn

• Reisemål: Ein framand planet
• Spel: Subnautica
• Plattform: PC, PS4, Xbox One

Du krasjlandar på ein framand planet, dekka av eit hav som skjuler hemmelegheiter, skattar og ein flora og fauna frå ei anna verd. Målet er å reise heim igjen, men på vegen dit blir dette havet ein mystisk, magisk og fantastisk heim.

Mysterium i norsk bygd

• Reisemål: Norsk fjordbygd
• Spel: Draugen
• Plattform: PC, PS4, Xbox One

I dette spelet kan du oppleve flotte, norske fjordar frå di eiga stove. Det heile er eit slags mordmysterium lagt til ei vakker fjordbygd på 1920-talet.

LES: 22 speltips til ferien