Poeten Amanda Gorman blei hylla etter at ho deltok på innsettingsseremonien for president Joe Biden tidlegare i år. I Noreg har Gyldendal sikra seg retten til å gi ut dikta hennar.
Men i Nederland har planane om å gi ut diktsamlinga til Gorman skapt debatt. Forlaget Meulenhoff har fått kritikk etter at dei gav forfattaren Marieke Lucas Rijneveld med å gi dikta nederlandsk språkdrakt, skriv The Guardian.
Blant dei som var kritiske var journalisten og aktivisten Janice Deul, som gjerne skulle sett at ein ung, svart poet hadde fått oppgåva.
– Eit uforståeleg val, etter mitt syn. Er ikkje dette, mildt sagt, ein tabbe å gi denne jobben til Marieke Lucas Rijneveld? Hen er kvit, ikkje-binær og har ingen erfaring i dette feltet, skreiv ho i ein kronikk i De Volkskrant.
Trekte seg
Ifølge forlaget var det Gorman sjølv som hadde vald seg Rijneveld som omsetjar fordi dei begge hadde hatt suksess i ung alder.
Rijneveld, som verken identifiserer seg som mann eller kvinne, debuterte som forfattar 25 år gammal, og fekk den internasjonale Bookerprisen i fjor.
Den nederlandske forfattaren Marieke Lucas Rijneveld reknar seg som ikkje-binær. Hen trekte seg frå oppdraget med å gjendikte Gorman i nederlandsk språkdrakt etter at valet vakte sterke reaksjonar.
Foto: JEROEN JUMELET / AFPMen dei kraftige reaksjonane som kom etter at forlaget gjorde det kjent kven som oppdraget med å omsette, har fått Rijneveld til å trekke seg frå oppdraget.
– Eg er sjokkert over oppstyret dette har skapt, og eg forstår dei som kjenner seg såra over Meulenhoffs val om å spørje meg, skreiv hen i eit innlegg.
Forlaget seier at det var Rijneveld som sjølv valde å slutte, og at dei skal ta lærdom av saka.
– No skal vi sette saman eit lag som skal arbeide for å få omsett Amandas ord og bodskap så godt som mogleg, og i hennar ånd, sa forlagssjef Maaike le Noble.
