Aksjon for å stoppe musikken til R Kelly

Med utselde konsertar og hits som «I Believe I Can Fly» og «Ignition» er R Kelly ein av dei mest suksessrike R&B-artistane i verda.

Men heilt sidan han slo igjennom på 90-talet, har det fleire gongar kome skuldingar om seksuelle overgrep.

Kelly har verka å vere immun mot skandalane. Med ein solid songkatalog, iherdige tilsette og lojale fans, har han kunne halde fram å lage musikk og tene pengar.

Han har avvist alle skuldingane, samtidig som han har inngått fleire forlik. I 2008 blei han også frikjent for overgrepsskuldingar mot ein mindreårig, trass i at aktor førte som bevis ein video av handlingane han var tiltalt for.

Stjerner støttar boikott

Men no kan det verke som om R Kelly er i ferd med å bli innhenta av #metoo-kampanjen, skriv The New York Times.

I fjor sommar starta kampanjen #MuteRKelly for å stoppe R & B-stjerna. Og sidan då har fleire konsertar blitt avlyste. Blant dei er konserten han skulle ha gjort i heimbyen Chicago til helga. Men Ticketmaster opplyser no at Kelly ikkje skal opptre, skriv Billboard.

• Les: Forsvarar Bill Cosby etter overgrepstiltale

Fleire sluttar no seg til kampanjen om å boikotte Kelly. Time's Up-bevegelsen, som oppstod i kjølvatnet av #metoo-kampanjen, ber i eit ope brev i The Root selskap som RCA Records, Ticketmaster og Spotify om å bidra til å stilne R Kelly ved å bryte samarbeidet dei har med artisten.

Blant dei som offentleg har støtta aksjonen er artistane Janelle Monáe og John Legend:

Også Tarana Burke, som var kvinna som starta #metoo, seier ho støttar aksjonen med å stoppe R Kelly:

– Offer for ein vondsinna konspirasjon

Managementet til R Kelly skriv i eit ope brev i Variety at dei undrar seg over at Time's Up støttar kampanjen mot artisten. Dei meiner aksjonen mot R Kelly ikkje baserer seg på fakta, og er ei heksejakt.

– Herr Kelly er eit offer for ein grådig, målretta og vondsinna konspirasjon som har som mål å fornedre han, familien hans og kvinnene han bruker tida si på.

Dei skriv også at musikken til R Kelly er ein del av den amerikanske og afroamerikanske kulturen, og at det er uhøyrt at nokon vil stilne denne musikken.

– Vi vil kjempe med nebb og klør mot dette forsøket på ei offentleg lynsjing av ein svart mann som har gjeve ekstraordinære bidrag til kulturen vår.

I ei melding på Twitter beklagar Kelly at konserten i Chicago er avlyst, og seier han vil undersøke kva som har skjedd.