– God ESC-trekning for Noreg

I dag blei semifinalane til ESC trekte i Stockholm. Noreg skal, i år som i fjor, delta i den andre semifinalen, som blir avvikla i Stockholm torsdag 12. mai. Her møter det norske bidraget blant andre Australia, som skal vere med i konkurransen for andre gong.

Populært i Australia

ESC har blitt ei av dei store tv-sendingane i Australia, og i samband med 60-årsjubileet for konkurransen i fjor, blei dei invitert til å delta. Guy Sebastian blei direkte plassert i finalen, og kom på femteplass. I år må dei altså gjennom ein semifinale.

I tillegg til Australia skal Noreg også møte Danmark og landet med flest sigrar i ESC, Irland, i semifinalen. Irland har vunne sju gongar, medan vertskapet Sverige med sine seks sigrar ligg som nummer to på lista.

Men det norske bidraget skal også bryne seg på deltakarland som Ukraina, Kviterussland og Albania i semifinalen. Det har fleire gongar kome skuldingar om at naboland stemmer kvarandre fram, og at samansetninga i semifinalane difor har mykje å seie for om deltakarar går vidare eller ikkje.

– Fordel for Noreg

Morten Thomassen i den norske Grand Prix-klubben har trua på at det som måtte bli det norske bidraget i år.

– Eg er godt nøgd. Vi kom i siste semifinale saman med våre gode vener frå Danmark. Vi slapp også mange av dei austeuropeiske landa som Armenia, Aserbadsjan og Russland som alltid klarer å ta seg til finalen. Eg går ut frå at vi skal klare å bli blant dei ti beste låtane i vår semifinale.

I tillegg til dei ti beste låtane frå kvar semifinale, er vertslandet Sverige direkte kvalifisert til finalen. Det er også Frankrike, Tyskland, Spania, Storbritannia og Italia. Dei blir kalla dei fem store fordi dei er dei største bidragsytarane økonomisk, og er difor direkte kvalifiserte.

Finalen blir i år arrangert laurdag 14. mai i Stockholm. Kva som blir det norske bidraget blir avgjort 27. februar.