Hør:
Laurdag blei det konsumert tonnevis av Haggis verda over, også i Norge. 25. januar er nemleg bursdagen til den skotske poeten Robert Burns, og overalt der ein feirar Burns-night, eller Burns-aften, står den skotske nasjonalretten på bordet.
Hemmeleg ingrediens
I produksjonsrommet ved Solheim Kjøt AS i Bergen står ein skotsk slaktar som er innflogen eins ærend for å imøtekomme etterspørselen frå haggis-elskarar i Norge. Med seg i kofferten frå Edinburgh har Joe Findlay med seg ei mystisk brun krydderblanding, den hemmelege ingrediensen som er overlevert frå generasjon til generasjon i nesten 200 år.
Stappar haggis i Bergen
At Joe Findlay stappar haggis i Bergen er eit resultat av den katastrofale Burns-festen i Bergen for tre år sidan. Som vanleg bestilte den skotske foreningen i Bergen haggis frå Skotland, men den kom ikkje fram før to veker etter festen. Den blei sendt på kryss og tvers over heile Europa, i fly til Belgia og i varebil til Bergen i Tyskland. Då den endeleg kom til Norge blei den ikkje plassert på kjølelageret, og då den endeleg kom fram til Bergen, etter tre veker på vegen, måtte den rett i bosset.
Haggis sendt landet rundt
Joe Findlay blei redninga, - både for Burnsfesten i Bergen og fleire andre stader i landet. Etter at han laga 100 kilo haggis i Bergen i fjor har bestillingane strøymt inn, og i år er produksjonen oppe i 250 kilo.
Leiar i Bergen skotske forening, James Hosea, seier han er blitt kontakta folk frå Jæren til Trondheim, så i dag blir kilovis av haggis sendt til Burns-festar landet over. Joe Findlay har vunne fleire prisar og meisterskap med haggisen sin, og slakteriet hans i Edinburgh produserer fem tonn haggis til Burns-festar kvart år. No er han altså oppe i eit kvart tonn til det norske markedet.
Til ære for poet
Poeten alt dette er til ære for, Robert Burns, levde på 1700-talet. Han betyr veldig mykje for skottane, og bursdagen hans er som ein uoffisiell nasjonaldag.
Under Burns-festane i dag blir den fyrste haggisen høgtideleg paradert rundt i rommet, akkompagnert av sekkepipemusikk, før den endar opp ved høgsetet. Der deklamerer ein eit av Burns sine mest kjende dikt, 'Adress to a Haggis', - ein ode til haggisen.
Her er det fyrste av mange vers:
Fair fa' your honest, sonsie face,
Great chieftain o' the puddin-race!
Aboon them a' ye tak your place,
Painch, tripe, or thairm:
Weel are ye wordy o' a grace
As lang's my arm.
Hør:
Norgesglasset NRK P1