- Taper milliardar på fildeling

I ein kronikk i Aftenposten i dag kritiserer dei politikarane for å ikkje bry seg.

Trass i dommen i Pirate Bay-saka, er det få hinder på vegen til nettstader for ulovleg fildeling.

I juni saksøkte Tono og fleire andre opphavsrettorganisasjonar Telenor. Dei hadde sett seg lei på at teleselskapet ikkje gjorde noko for å blokkere tilgang til nettstader som driv med ulovleg fildeling.

Geir Bøhren og Bent Åserud har saman komponert musikk til nærare 30 skandinaviske spillefilmar og ei rekkje TV-seriar. De to komponistane kritiserer politikarane for å ikkje ta noko standpunkt, og meiner Regjeringa bør gripe inn overfor teleselskapa.

Berre éin dom

Hundrevis av tilfelle av ulovleg fildeling vert melde til politiet, men likevel har ikkje domstolane i Noreg klart å få meir enn éin rettskraftig dom mot ulovlege fildelarar.

Musikkbransjen har anslått at dei taper ca 220 mill på ulovleg fildeling. Men Bøhren og Åserud meiner at det er eit konservativt anslag, og at musikk- og filmbransjen samla sett truleg taper fleire milliardar i året.

- I Noreg vert det lasta ned ein milliard verk i året. Det vert åtte milliardar, dersom ein tek utgangspunkt i at ein song kostar åtte kroner som hjå iTunes, seier Bent Åserud.

- Må følgje opphavsrettlova

- Venstre og SV kan ikkje berre bestemme seg over natta for at dette skal vere lovleg. Opphavsrettlova er knytt til internasjonale avtalar, seier komponist Bent Åserud.

- Det Bent Åserud seier er feil. SV har ikkje gått inn for å tillate fildeling. Vi vert tillagt feil meiningar, seier nestleiar i SV, Audun Lysbakken.

Lysbakken meiner at utgangspunktet for debatten er problemstillinga med skjeringspunktet mellom omsynet til åndsverklova, som sikrar kunstnarane kompensasjon, og den teknologiske utvikling som gjer at det har vorte lettare å laste ned på ein ulovleg måte.

- Spørsmålet er korleis ein skal klare å kompensere kunstnarane på ein måte som ikkje fører til alvorlege overtramp av personvernet når det gjeld overvaking av nettet, og som ikkje fører til at staten skal gå inn og definere kva sider som skal vere tilgjengelege.

- Teleselskapa må gjere noko

- SV er raske med å hyle om overvaking og personvern, noko som tydelegvis gjeld alle andre opphavsretteigarane. Det er ikkje snakk om å overvake, det finst teknikk som kan telje kvart einaste verk som vert lasta ned, seier Åserud.

Åserud meiner at teleselskapa må kome på banen og vise at dei er interesserte i å finne gode løysingar.

- Dei sit i ein krok og latar som dei ikkje gjer noko, men dei formidlar faktisk verk verna av opphavsretten. Og det har dei ingen rett til å gjere, seier Åserud.

Lysbakken tykkjer det er viktig å kome fildeling til livs, men ynskjer ikkje at staten skal definere kva nettsider som skal vere opne. Han deler Åserud si uro, men er usikker på kva løysinga er.

- Vi meiner at ein må gjere noko med det, viss ikkje kjem mange kunstnarar til å miste levebrødet sitt. Men kompensasjonen må ikkje gå på bekostning av personvern og nettnøytralitet. Vi har ikkje sagt at vi har svaret på det, men vi har i partiprogrammet gått inn for ei brei utgreiing av ulike løysingar. Vi vil gjerne ta debatten, seier Audun Lysbakken.

- No finst det så mange lovlege løysingar, som Spotify og last.fm. Politikarane må gå ut å seie at fildeling er ulovleg. Hittil er det berre Olemic Thommesen i Høgre som har gjort det, seier Komponist Bent Åserud.

• Bør alle politiske parti ta eit standpunkt til fildeling? Sei di meining her!