Petr Popelka, dirigent
Yi Yang og Sergey Levitin, fiolin
- Richard Wagner: Eine Faust-ouverture
- Alfred Schnittke: Concerto grosso nr. 1 for to fiolinar, cembalo, preparert klaver og kammerorkester
- Richard Wagner/arr: Engelbert Humperdinck: Siegfrieds Rheinfahrt frå Götterdämmerung
- Richard Wagner/arr: L. Stasny: Siegfrieds Tod und Trauermarsch frå Götterdämmerung
- Richard Wagner: Wotans Abschied und Feuerzauber frå Die Walküre
Mektig musikk av Wagner er for mange knytt til både operasongarar og store orkester. Her skal du få oppleve det storslegne i utdrag frå Ringen av Richard Wagner, da i instrumentale arrangement som KORK skal løfte til taket i Store studio. Faust-ouverturen er derimot eit reint orkesterverk, kanskje tenkt som ein del av ein symfoni. Til liks med fleire av kunstnarane i romantikken var Wagner oppteke av skikkelsen Faust, som inngår ei pakt med djevelen, gjort udødeleg i det berømte skodespelet av Goethe
Kontrasten til Wagner kunne kanskje ikkje vore større med Alfred Schnittkes Concerto grosso. Her er ein av konsertmeistrane i KORK, Yi Yang og konsertmeister i Royal Opera House (London), Sergey Levitin solistar. Det er eit verk som verkeleg krev virtuose fiolinistar, i tillegg til ein solist på cembalo og preparert piano. Samtidig er det eit verk som går i mange retningar stilmessig, og det er absolutt med vilje. Ifølgje Schnittke sjølv, kombinerer han i denne konserten tre musikalske «sfærar»: barokkens concerto grosso, med fleire solistar, fri halvtone- og mikrotonalitet og det han kallar «vulgær bruksmusikk». I krasjet mellom avanserte komposisjonsteknikkar og populærmusikk, skaper Schnittke ein heftig og ekspressiv musikk som alltid røskar godt tak i publikum..
OBS: Konserten er flytta frå Universitetets aula
