Václav Luks, dirigent
Mari Eriksmoen, sopran
- Josef Mysliveček: Ouverture II i A-dur
- Wolfgang Amadeus Mozart: Misera dove son … Ah! Non son io, konsertarie
- František Xaver Dušek: Symfoni i B-dur
- Wolfgang Amadeus Mozart: Bella mia fiamma, addio … Resta, o cara, konsertarie
- Jan Václav Hugo Voříšek: Symfoni nr. 1 i D-dur
Eit orkester på storleik med KORK (54 musikarar) kan støyte på utfordringar med dei største verka som krev eit stort orkesterapparat. Men oftast gir det KORK høvet til å vere eit fleksibelt orkester, som kan svinge i alle slags stilar frå barokk til rock. Musikken frå 1700-talet, då Mozart levde, passar også godt til eit orkester som både er lett på labben og med rytmisk snert. KORK får besøk av ein av dei leiande sopranane både i Noreg og verda. Mari Eriksmoen skal briljere i to Mozart-ariar, skrive spesielt for konsertsalen.
Men det var ikkje berre Mozart og Haydn som komponerte musikk på 1700-talet. Stadig nye og spennande komponistoppdagingar blir gjorde, og ein som har ei spesiell interesse for eldre og mindre spelt musikk er dirigenten Václav Luks. Den tsjekkiske musikaren, dirigenten og musikologen skal la oss få bli kjende med heile tre tsjekkiske komponistar, alle fødde på 1700-talet, og alle verd ei oppdaging.
