Som einaste land i Europa har Noreg framleis eit totalforbod mot å ha reptil og amfibium som kjæledyr.
Nå vurderer Mattilsynet og Landbruks- og matdepartementet om forbodet frå 1976 bør opphevast for nokre artar.
- Det er eit behov for oppdatering av regelverket. Tilhøva har endra seg sidan forbodet kom, seier rådgjevar Maria Veggeland i Mattilsynet.
Nå kan det bli lov med omlag 30 artar, som til dømes kongeboa, regnbueboa, argentinske hornfroskar og leopardskilpadder.
- Mange ulovlege slangar
Til trass for at det i dag er eit forbod, er det likevel mange som held slike husdyr. Anslagsvis er det mellom 10.000 og 100.000 ulovlege reptil og amfibium her i landet. Nyleg vart ein mann frå Kongsvinger-området dømt for å ha to ulovlege slangar.
Ein av dei som tekhand om beslaga som politi og tollvesen gjer, er Øyvind Ørmen ved Mattilsynet sitt kontor i Kongsvinger.
- Vi har gjort beslag av øgler, tigerpyton, snoker og boaer. Vi har sett både ukjente og truga artar, seier Ørmen.
- Premierer smugling
Han seier at dei plasserer dei beslaglagte slangane i reptilsentre eller dyreparkar. Dei får ikkje omplassert alle, og ein del må avlivast.
Nå kan det bli langt færre reptil å ta hand om, dersom Mattilsynet får støtte i departementet i sitt ynskje om å oppheve forbodet for ein del artar.
Dyrevernalliansen og deira biolog Anton Krag, er skeptisk til å oppheve forbodet. Han meiner det blir som å premiere dyresmugling og ulovleg dyrehald ved å legalisere store delar av det.