Synest det er trist at Elverum sjukehus kan bli lagt ned. – NRK Innlandet

Hopp til innhold

I dag la Helse Sør-Øst fram sitt forslag til kor alle sjukehusa i fylket skal ligge i framtida. I planane ligg det å legge ned sjukehuset på Elverum, og i staden bygge eit lokalmedisinsk senter og base for luftambulanse.

– Eg er nervøs for korleis det blir. Eg hadde tenkt å slå meg til ro her, ta vidareutdanning og få kjøpt meg bustad. Men eg har revurdert no, seier Christoffer Hagen Mathisen (26).

Han har jobba som sjukepleiar ved akutten i to år.

Les også: Sjukehuskrangel: Full forvirring om kor Mjøsbrua ligg

Tårer i auga

Hagen Mathisen og Simen Sanderlien (37) fortel at det har vore ein tung arbeidsdag ved sjukehuset.

– Kollegaer som jobbar her hadde tårer i auga i dag, fortel Sanderlien.

Sjølv har han jobba som sjukepleiar der i ti år og har etablert seg i Elverum med to ungar og kone. Han seier at å legge ned sjukehuset går utover veldig mange menneske.

– Ein riv opp eit ganske etablert fagmiljø, akuttmedisin. Distansar er ein ting, og folk skal jo vere trygge. Det er ganske langt frå Trysil til Brumunddal, seier han.

Han bur 400 meter frå sjukehuset og har busett seg der for å vere nærme jobben.

– Det er ikkje et tema å skulle pendle, seier han.

Mjøssjukehus i Brumunddal

Det har vore planar om å bygge eit nytt stort sjukehus for heile Innlandet lenge. Det har vore snakk om å legge dette til Moelv. Men då Helse Sør-Øst la fram planane i dag sa dei at dei vil det skal hamne i Brumunddal.

Christoffer Hagen Mathisen utdanna seg i Elverum og fekk jobb etterpå. Han trivst godt og vil helst bli verande der. Han veit ikkje om han vil vere med over i eit nytt Mjøssjukehuset i Brumunddal.

– Det er vanskeleg å seie, men om alle som jobbar her skal søke dit så er det jo ikkje nok. Det er snakk om utruleg mange arbeidsplassar. Mange er knytt til sjukehuset, seier han.

Det har ligge i lufta at Helse sør-øst skulle seie at dei vil legge ned sjukehuset i Elverum. Hagen Mathisen seier det har vore tungt.

– Vær så snill, revurder, seier 26-åringen.

Dei to tilsette får støtte frå tidlegare tilsett på sjukehuset, Berit Mømb Sveen. Ho er på besøk hos mannen sin som ligg innlagt på sjukehuset. Etter besøket hang ho opp rundt 15 hjarter i julegrana utanfor sjukehuset som det står «Elverum har hjarterom».

– Eg vil så veldig gjerne at sjukehuset skal fortsette å vere her, seier ho.

Sveen synest det er trist om sjukehuset ho sjølv har jobba ved, leggjast ned.

– Det er veldig trist og leit for hele området, og for alle som høyrer til her. Mannen min ligg her for andre gong og vi har vore nøgd med behandlinga han har fått her, seier ho.

No skal forslaget til styringsgruppa i Helse Sør-Øst først til Sjukehuset Innlandet, før det blir vedteke av Helse Sør-Øst 4. februar 2021. Så skal saka til Helseministeren.

Glede på Lillehammer

Diskusjonen om sjukehusa har vara i fleire år. Aksjonsgrupper i Lillehammer har også vore veldig synlege i denne debatten. Dei har heile vegen kjempa for å få behalde akuttsjukehuset der. Det får dei truleg.

– Glad for at vi er blitt lytta til, seier Lillehammer-ordførar Ingunn Trosholmen.

Bjørn Nørstegård, som har vore leiar for sjukehusaksjonen på Lillehammer er også glad. Men han trur ikkje siste ord er sagt.

– Det er nok ikkje i hamn. Vi er ikkje naive. Vi veit dette er ein vanskeleg og krevjande sak, seier han.

Samstundes seier også han at det kjennest som dei har blitt høyrt.

– Formålet med aksjonen vår er å berge sjukehuset. Vi har kjensler for Gudbrandsdølane som har lengst reiseveg. Og vi må jo seie at dei har blitt høyrt. Det er vi veldig glade for, seier han.

Gerd Elisabeth Nonstad har site i styringsgruppa og er leiar i Brukarutvalet i Sjukehuset Innlandet.

– Vi håpar ikkje det blir politisk rot no, slik at dette ikkje blir noko av, seier Nonstad.

Dette meiner politikarane om sjukehussaka:

Rigmor Aasrud og Tore Hagebakken (Ap):

Meiner at planane om eit nytt Mjøssjukehus lever farleg, dersom Helse sør-øst vel å sjå bort frå ein semje som er jobba fram over lang tid i Innlandet.
Hagebakken, Innlandets einaste representant i helsekomiteen, seier all semje kullkastes, dersom sjukehuset foreslås lagt til Brumunddal.

Marit Knutsdatter Strand og Bengt Fasteraune (Sp):

Meiner at Helse sør-øst behandlar sykehussaken i Innlandet på ein uryddig måte.
Dersom eit nytt Mjøssykehus leggjast til Brumunddal i staden for ved Mjøsbrua, så trur Strand at vesentlege deler av pasientgrunnlaget frå Hadeland og deler av Valdres vil forsvinne.
– Det er vanskeleg å stole på Helse sør-øst når de til stadigheit endrar føresetnader for den framtidige sjukehusstrukturen i Innlandet, seier stortingsrepresentant Bengt Fasteraune. Han reagerer sterkt på planane om å flytte Mjøssykehuset frå Mjøsbrua til Brumunddal.

Morten Ørsal Johansen (Frp):

Frps stortingsrepresentant Morten Ørsal Johansen meiner det er feil å satse på eit nytt storsjukehus i staden for å ruste opp og behalde dei mindre sjukehusa vi har i dag.
Har ingen tru på at eit storsjukehus ved Mjøsa klarer å konkurrere med sjukehusa i Osloregionen om fagkompetansen. – Dessutan er Innlandet eit distriktsfylke med store avstandar, seier Ørsal Johansen.

Ketil Kjenseth (V):

Seier han aldri har vore for et stort Mjøssykehus. Han øyner nå eit håp om at det ikkje blir et altfor stort nytt sjukehus, og at det heller blir bygget vidare på dei sjukehusa som finst i dag.

Karin Andersen (SV):

Vil at Elverum sjukehus skal bestå. – Det har eg tenkt å kjempe for, seier ho.
Meiner at alle stortingsrepresentantane frå Hedmark har det same synet. – Så då får vi sette oss saman, og sjå korleis vi kan lause dette framover. Slik at vi både får eit nytt sjukehus ved Mjøsbrua, og at vi beheld Elverum, seier Andersen til NRK.

Nils Kristen Sandtrøen (Ap):

Meiner det er oppsiktsvekkande at det nye sjukehuset nå blir flytta frå Mjøsbrua til Brumunddal. Sandtrøen seier til NRK at han reagerer på at ein endrar den viktigaste føresetnaden i tolvte time.
Seier at når ein nå går vekk frå at det nye sjukehuset skal ligge ved Mjøsbrua, så rokker det ved hele balansen, og ein får som konsekvens at Elverum leggjast ned. – Uklokt, seier Sandtrøen.
Legger til at han meiner at helseministeren ikkje må vere så tafatt som det han er nå. – Han må manne seg opp, og lytte til dei lokale råda.

Tor André Johnsen (Frp):

Meiner at Elverum sjukehus skal bestå. – At det kan bli lagt ned syns eg er trist og horribelt, seier Johnsen.
Seier til NRK at han blei heilt «sett ut» då han leste nyheita i går. – Eg såg ikkje den komme. Eg må rett og slett ta fighten for Elverum sjukehus, det skulle berre mangle. Men eg hadde håpa og trudd at eg skulle sleppe det.
Meiner at regjeringa har rota til prosessen. – Det har eg og sagt til ministeren og statssekretæren. Her var det einigheit, ro og samarbeid. Den gode prosessen som var der er nå øydelagt. Eg fryktar i verste fall at vi rykker heilt attende til start.