Hopp til innhold

Vil ha slutt på humleimport

Det blir no forbudt å importere humler til Noreg. Det skjer etter at Miljødirektoratet har konkludert med at det er i strid med naturmangfaldslova å innføre mørk jordhumle.

Humle

Import av humle til Noreg vert no forbudt.

Foto: Bjørn E. Halvorsen

Etter at miljødirektoratet har konkludert med at innføring av mørk jordhumle som ikkje er rømningssikre er i strid med naturmangfaldslova, så er det no slutt på humleimport til Noreg. Det gjer no at Hamar-firmaet Norgro AS sluttar med import av humler.

– Miljødirektoratet har foreløpig sagt at import av humler vil kunne medføre brudd på naturmangfoldsloven, så då har me bestemt oss for å slutte med humleimport, seier Arne Gillund som er fagsjef i Norgro AS til NRK.

Den utanlandske mørke jordhumla har frå 2011 vore mogeleg å importere til Noreg for bruk i drivhus, mellom anna til pollinering av tomatplanter.

– Importerte individ kan både overføre genetisk materiale til humler av same art som høyrer heime her i landet, kan fortrengje andre humleartar og kan overføre smittsame sjukdomar og parasittar, seier Bjarte Rambjør Heide som er seksjonsleiar i Miljødirektoratet i ei pressemelding frå Miljødirektoratet.

Glad for stopp av import

At det no vert slutt på humleimport er godt likt av Lars Haltbrekken som er leiar i Naturvernforbundet. Det seier han i ei pressemelding Naturvernforbundet har kome med.

– Det er eit kjærkomme skritt i riktig retning at Norgro nå har stanset sin humleimport, seier han.

– For å sikre bestøvninga av både nytteplanter og vill natur, så må me ta vare på dei norske humlebestandene, legg han til.

Vart meldt

Hamar-firmaet Norgro AS blei i vår meldt for humleimport, nettopp fordi humlene dei importerte var i strid med naturmangfaldslova.

Det var naturvernforbundet og samarbeidet for biologisk mangfald som anmeldte Nordgro fordi dei meinar dei utanlandske humlene er ein trussel mot dei norske humlene.

No har Miljødirektoratet konkludert med det same. Gillund i Nordgro AS meinar dei fylgde det regelverket som låg til grunne då dei importerte sine humler.

– I fylgje det regelverket som låg til grunn så meiner me at Nordgro har drive importen riktig, men i og med at Miljødirektoratet no meinar at det er ulovleg så har me ikkje noko anna val enn å slutte med det, seier Gillund.

I fylgje Miljødirektoratet har samarbeidet med Norgro vore bra. Og når det no blir forbudt å innføre utanlandske humler og bruke dei i drivhus som ikkje er rømningssikre, så kjem det enno til å vera nokre importhumler att i Noreg i ei tid framover.

– Humlene me har no vil bli destruert etter kvart som dei er ferdig med jobben sin, så etter sommaren har me ikkje desse humlene meir, seier Gillund.

Flere saker fra Innlandet