Slik blir påska i fjellet: Rekordlite snø i aust, meir enn nok i nord og midt

Turistvert Rune Sundt på Grimsdalshytta, nord i Rondane, er lei seg. Nå må han halde stengt for tredje år på rad.

Først to år med pandemi, nå eitt år med snømangel.

– Vi hadde gledd oss til å endeleg å opne hytta og ta imot påsketuristar. Det er trist at vi må halde stengt, seier Sundt.

Andre plassar i Noreg, til dømes i Trøndelag, er det så mykje snø at det har vore tidkrevjande å spa fram hyttene.

Lenger sør er det stutt veg mellom berrflekkane.

Det er DNT Oslo og omland som i samråd med turistvertane har bestemt å halde stengt på Grimsdalshytta, Bjørnhollia og Øvre Dørålseter i Rondane.

I tillegg blir det stengt på Liomseter i Langsua nasjonalpark i Gausdal.

Også i Hallingdal og på Hardangervidda blir det meldt om lite snø for årstida, men det ligg meir snø til lenger vest ein kjem i desse områda.

Mange plassar på Vestlandet og i Nord-Noreg har mykje snø denne våren.

• Her kan du sjølv sjekke snøkartet over Noreg.

Rondvassbu, midt i Rondane, held ope. Her er det meldt om brukbare snøtilhøve.

Men derfrå må du gå dagsturar, sidan dei andre hyttene i same løypenett er stengt. Difor blir heller ikkje løypene stukke, ifølge DNT.

Les også Karl Jonas (25) ble første på ski ned fra denne toppen

Halvparten av normalen

Ifølge NHO Reiseliv skal annankvar nordmann på påskeferie i år.

85 prosent av dei legg opp til noregsferie. Det er det høgste talet som er målt sidan undersøkinga starta i 2014.

Men samstundes kan Norges vassdrag- og energidirektorat (NVE) stadfeste at det er rekordlite snø mange stader i Sør-Noreg.

– Det er berre halvparten av det som er målt som normalt. Ja, det er faktisk topp tre lite snø på stader som Atna i Nord-Østerdal og på Sjusjøen i Ringsaker. Det seier Hallgeir Elvehøy i NVE.

Det har vore mildt og lite nedbør gjennom heile vinteren, og spesielt lite nedbør og mildvêr har det vore i mars.

Vinteren 1996 og vinteren 2012 er dei to andre snøfattige vintrane i nyare tid.

Men nå er det meldt kjølig vêr heilt fram til påske, så den snøen som er, blir liggande.

– Men berrflekkane vil vekse fordi dei tinar i sola om dagen. Så det kan bli fine flekkar å sitte og raste på, seier Elvehøy.

Måtte grave fram inngangen

Om du kjem lenger vest i fjellet, t.d. vest i Jotunheimen, er det mykje meir snø, nokre plassar nesten meir enn normalt. Like eins i Trøndelag og i Nord-Noreg.

Målingar som NVE gjorde 17. mars viste rekordmykje snø på toppen av Vangslia i Oppdal.

Det er meldt påfyll med snø og kuldegradar framover, så det blir godt med snø att til påske.

I Tydal i Trøndelag er det så mykje snø at det er ein stor jobb for dei tilsette på turisthytta Storerikvollen å grave ho fram att.

Anette Berglund er vertinne på Storerikvollen, og ho melder om strålande forhold. Men det har vore ein krevjande jobb å komme seg inn.

– Det blei mange kubikk med snø, seier ho, men melder om at det nå straks er klart for gjestene.

Jonny Remmereit i Trondheims turistforeining seier at det nå blir jobba på spreng i alle hyttene i Trøndelag for å gjere klart til påske.

– Det blir moka snø, bestilt mat, og på alle måtar gjort klart for gjestene. Og vi stikk løyper mellom hyttene. Det er magisk å kunne opne opp utan koronarestriksjonar, seier Remmereit.

Les også I fjor måtte ho ha ufrivillig påskeferie – i år er gjestene tilbake på turisthytta

Øyerfjellet: Aldri opplevd mindre snø

Michelle Hasle bur til vanleg i Oslo, men har halde til på hytta i Hafjell med heimekontor dei siste månadene.

Ho trener for å delta på Troll Ski Maraton til helga, der ho skal gå den 95 kilometer lange distansen frå Venabu til Sjusjøen.

Ho har utnytta skiløypene trass i at det ikkje har vore like mykje snø som før.

– Eg kan ikkje hugse sist det var så lite snø her i mars. Men jammen meg har løypekøyrarane vore flinke og fått til fine løyper med den vesle snøen som har vore, seier ho.

Ho har trua på påskeferien.

– Eg har trua på at det blir snø og «nikkersføre».

Kvifor feirer vi påske?