Martine Øverland Sagheim frå Gausdal og sambuaren hennar, Anders Wold Grut, er midt i oppussing av draumehuset. Etter fleire år som leigetakarar fall dei for eit hus frå 1967 i Buvika, litt utanfor Trondheim.
– Det trengde kjærleik, og vi bestemde oss for å totalrenovere, seier Martine.
For å få råd til huset, gjer dei mykje sjølv, sidan Anders er handverkar. Det har også gitt dei høve til å følgje nøye med på prisauken som har skjedd det siste året.
– Då vi vart varsla om ei prisauke i april i år, heiv vi oss rundt og fekk kjøpt inn ein del materiale til éin av to verandaer, men vi fekk ikkje tak i dei terrasseborda vi hadde tenkt å kjøpe, seier Martine.
Framgangen blir dokumentert på instagramkontoen deira @husetibrekka.
Det har gått mykje arbeid inn i huset det siste året.
Frå isolering før snøen kom ...
... til ferdig trekledning.
Auke i oppussing og pris
Mange har byrja på oppussingsprosjekt medan dei har hatt meir tid heime i pandemien. Det merkar byggevarebransjen.
REKORDKVARTAL: Moelven har aldri hatt eit så godt første kvartal.
Foto: Vegard Breie, Moelven– Dei internasjonale prisane har endra seg mykje fortare enn det eg nokon gong har vore med på, seier Bjarne Hønningstad, divisjonssjef i Moelven Wood.
Årsaka til at prisen på trebaserte byggemateriale blir høgare er samansett.
– Tre er eit attraktivt materiale grunna det grøne skiftet, og når det er ein auke i oppussing, både i Noreg og med byggeaktivitet i USA, samstundes som Nord-Amerika må importere meir grunna borkbiller i Canada, blir det prisauke.
Prisen på byggemateriale av tre har skote i vêret sidan 2020.
Tre er eit fornybart byggemateriale, og med auka miljøfokus har etterspurnaden vakse.
Etterspurnaden er internasjonal. I USA har prisen firedobla seg sidan august. Der er tømmeret nemleg påverka av canadiske borkbiller.
Samstundes er det mange nordmenn som vil pusse opp, og då blir materialet dyrare.
- Les også:
- Les også:
Byggevarebransjen går i pluss
Resten av bransjen har også merka trenden. Ifølgje Virke byggevarehandel hadde medlemsverksemdene deira ei auka omsetjing på 5,6 milliardar i 2020 samanlikna med 2019.
Eit oppsving i privatkundar er årsaka bransjeleier i Virke byggevarehandel, Aslaug Koksvik, peiker på. Likevel trur ho ikkje bransjen kan sjå på uendeleg vekst.
– Vi kan jo tenke oss at omsetjinga no er lånt frå framtida, og at etter pandemien er folk ferdig oppussa, seier ho.
Trass i dette er det ikkje teikn til stopp i prisveksten enno. Moelven hadde si største omsetjing i eit første kvartal, no i 2021.
PRISAUKE: Frå 1. juni må kundar vente endå ei prisauke på trelast.
Foto: MoelvenDei som ikkje har starta oppussinga enno, kan heller ikkje forvente billigare materiale med det første. Moelven og andre aktørar i marknaden har meldt eit prishopp frå 1. juni. Kor stort det blir er usikkert, men Hønningstad er forklarer at det heng saman med den store etterspurnaden.
– Prisane i Noreg følgjer den internasjonale marknaden.
Nok å gjere
For Martine og Anders tyder det ein brems i bygging av veranda, men dei meiner at det mest nødvendige er på plass. Martine seier at med fulltidsjobb er det ikkje berre pengar som må til for å gjennomføre eit slikt prosjekt.
– Vi treng ein god dæsj optimisme, mykje pågangsmot og tolmod. Det hadde heller ikkje gått utan kunnskapen til Anders, og at eg er lærevillig, seier ho.
